ބޮލީވުޑްގެ މަޝްހޫރު ބަތަލާ ސްރީދޭވީގެ މަރުހެ ހިތާމައިގައި މުޅި އިންޑިއާ އޮއްވައި، ބޮލީވުޑްގެ މަޝްހޫރު ޑައިރެކްޓަރު ރާޖްކުމާރް ސަންތޯޝީ ހޮސްޕިޓަލްގައި އެޑްމިޓްކޮށްފި އެވެ.
ރިޕޯޓްތަައް ބުނާ ގޮތުން ކާމިޔާބު އެތައް ފިލްމެއް ޑައިރެކްޓްކޮށްފައިވާ ސަންތޯޝީ އެޑްމިޓް ކުރީ މޭގައި ވަރަށް ބޮޑަށް ރިއްސައި، ހާލު ދެރަވާން ފެށުމުންނެވެ.
މުމްބާއީގެ ނަނަވަތީ ހޮސްޕިޓަލްގައި އޭނާ އަށް ފަރުވާ ދެމުން ދިޔަ ނަމަވެސް، ހާލަތާ ބެހޭ އެއްވެސް ތަފުސީލެއް އަދި ހާމަކޮށްފައެއް ނުވެ އެވެ.
މިހާތަނަށް ހަ ފިލްމްފެއާ އެވޯޑް ހާސިލްކޮށްފައިވާ ސަންތޯޝީ ޑައިރެކްޓްކޮށްފައިވާ ފާހަގަކޮށްލެވޭ ބައެއް ފިލްމްތަކުގެ ތެރޭގައި "ދާމިނީ"، "ގަތަކު"، "ގާޔަލް" އަދި އަންދާޒް އަޕްނާ އަޕްނާ" ހިމެނެ އެވެ.
އޭނާ އެންމެ ފަހުން ބެލުންތެރިންނަށް ގެނެސް ދިން ފިލްމަކީ ޝާހިދު ކަޕޫރާއި އިލިއާނާ ޑި ކްރޫޒް ލީޑް ރޯލް ކުޅުނު 2013 ގެ ފިލްމް "ޕަޓާ ޕޯސްޓަރު ނިކްލާ ހީރޯ" އެވެ. ސަންތޯޝީ މިހާރު އަންނަނީ ރަންދީޕް ހޫޑާއާ އެކު، ހަނގުރާމަތީ ތާރީހީ ފިލްމެއް ހަދަމުންނެވެ.