އައްޑޫ ސިޓީ، ހުޅުދޫ އަދި މީދޫގެ ރައްޔިތުންނާއި އައްޑޫ ސިޓީ ކައުންސިލުން ބޭއްވި ބައްދަލުވުމުގެ ތެރެއިން ކައުންސިލާއި ދެކޮޅަށް އަޑު އުފުލައިފިއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ކައުންސިލްގެ ފަރާތުން މިރޭ ހުޅުދޫ އަދި މީދޫގެ ރައްޔިތުންނާއި އެކު ބޭއްވި ބައްދަލުކުރުމަށް ޕީޕީއެމް އަށް ތާއީދުކުރާ ބަޔަކު ވަނީ ގޮސް އަޑު އުފުލާފައެވެ.
އެފަރާތްތަކުން އަޑު އުފުލާފައި ވަނީ "ސަރުކާރު ގަބޫލުނުކުރާ ކައުންސިލެއް ގަބޫލު ނުކުރާނަން" ލިޔެފައިވާ ބެނާއެއް ހިފައިގެން ތިބެއެވެ.
'އައްޑޫލައިވް' އަށް މައުލޫމާތު ދެމުން ކައުންސިލްގެ މީޑިޔާ އޮފިޝަލް ވިދާޅުވީ، ހުޅުދޫ އަދި މީދޫގެ ރައްޔިތުންނާއި އެކު ބައްދަލުވުން ކުރިއަށް ގެންދިޔަ ތަނަށް ބަޔަކު ވަދެ ބައްދަލުވުން ހުއްޓުވުމަށް މަސައްކަތް ކުރި ކަމަށެވެ. އަދި އެތަނުގައި ބާރަށް ލަވަޖަހައި ހަދަން ފެށުމުން ބައްދަލުވުން ކުރުކޮށްލީ ކަމަށް މީޑިޔާ އޮފިޝަލް ވިދާޅުވިއެވެ.
މައުލޫމާތު ލިބިފައިވާ ގޮތުގައި އެތަނުގައި ޕީޕީއެމް އަށް ތާއީދުކުރާ ބަޔަކު ގޮސް އަޑުއުފުލި ނަމަވެސް އެއްވެސް ހަމަނުޖެހެމެއް ހިނގާފައެއް ނުވެއެވެ. އަދި އެތަނަށް ހާޒިރުވި މީހުންގެ ސުވާލުތަކަށް އައްޑޫ މޭޔަރު ސޯބެ ޖަވާބު ދެއްވާފައި ވެއެވެ.
އައްޑޫ ސިޓީ ކައުންސިލްގައި ތިއްބަވާ 7 ކައުންސިލަރުންނަކީ ވެސް އެމްޑީޕީ އަށް ނިސްބަތްވާ ކައުންސިލަރުންނެވެ.
އައްޑޫ ސިޓީ ކައުންސިލްގެ ފަރާތުން ކޮންމެ އަހަރަކު ވެސް ރައްޔިތުންނާއި އެކު ބައްދަލުވުންތައް ބާއްވައެވެ. އެހެން ނަމަވެސް އެ ބައްދަލުވުންތަކަށް ރައްޔިތުންގެ ފަރާތުން އެކަށީގެންވާ ތަރުހީބެއް ނުލިބޭކަން ފާހަގަކުރެވެއެވެ.