އަނުޝްކާ ޝަރްމާގެ ބިރުވެރި ފިލްމް "ޕަރީ" މާދަމާ ސިނަމާތަކަށް އަންނަ އިރު، ފިލްމް ޕްރޮމޯޓް ކުރަން ހަދާފައިވާ ސްކްރީމާގެ ތެރެއިން ހަތް ވަނަ އެތި ދައްކާލައި ބެލުންތެރިން ބިރު ގަންނުވާލައިފި އެވެ.
މި ސްކްރީމާގައި ފެންނަނީ އަނުޝްކާ ފެން އަޅާފައި ހުންނަ ބިލިގާއެއްގެ ތެރޭގައި މާބަނޑު ހާލުގައި އޮވެ، ވިހަން ބަނޑުގައި ރިއްސާހެން ހަޅޭއްލަވާ ތަނެވެ. އަދި އޭނާގެ ބަނޑު ފުފިފައި ފަޅައިގެން ހިނގައިދާނެހެން ހީވާ ހިސާބަށް ދިއުމުން ކުއްލިއަކަށް، ސިއްސައިގެންދާ ކަހަލަ ގޮތަކަށް މާދަމާ ފިލްމް ސިނަމާތަކަށް އަންނަ ކަމަށް ސްކްރީމާ އަށް އަރަ އެވެ.
އާންމުކޮށް ބޮލީވުޑްގެ މަޝްހޫރު ތަރިން ބިރުވެރި ފިލްމްތައް ނުކުޅުނު ނަމަވެސް "ޕަރީ" ބިރުވެރި ހިންދީ ފިލްމްތަކަށް އިންގިލާބެއް ގެނުވާނެ ފިލްމެއް ކަމަށް މިހާރު ވެސް ވަނީ ބެލެވެން ފަށައިފަ އެވެ.
ޓެގް ލައިނަކަށް "ނޮޓް އަ ފެރީ ޓޭލް" ދީފައިވާ "ޕަރީ" އަކީ އަނުޝްކާގެ އަމިއްލަ ފިލްމް ކުންފުނި ކްލީން ސްލޭޓް ފިލްމްސް އާއި ކްރިއާޖް އެންޓަޓައިންމަންޓުން ގެނެސްދޭ ފިލްމެކެވެ.
މި ފިލްމްވެގެން ދާނީ މަޝްހޫރު ކްރިކެޓް ކުޅުންތެރިޔާ ވިރާޓް ކޯލީއާ ކައިވެނި ކުރި ފަހުން، އަނުޝްކާ ބޮޑު ސްކްރީނުން ފެންނާނެ ފުރަތަމަ ފިލްމަށެވެ.
"ޕަރީ" ގެ ޑައިރެކްޓަރަކީ ޕްރޮސިތު ރޯއި އެވެ. ފިލްމްގެ ކާސްޓުންގެ ތެރޭގައި ޕަރަމްބްރަޓާ ޗެޓަޖީ، ރަޖަތު ކަޕޫރް އަދި ރިއާ ޗަކްރަބަތީ ހިމެނެ އެވެ.