ދިވެހި ބޭންކް، ބޭންކް އޮފް މޯލްޑިވްސް (ބީއެމްއެލް) އަށް އިސްލާމިކް ބޭންކިންގެ ހިދުމަތް ދިނުމުގެ ހުއްދަ ދީފި އެވެ.
ބީއެމްއެލްގެ އޮފިޝަލަކު ވިދާޅުވީ އިސްލާމިކް ބޭންކިންގެ ހިދުމަތް ދިނުމުގެ ހުއްދަ އެ ބޭންކަށް މަރުކަޒީ ބޭންކް އެމްއެމްއޭގެ ބޯޑުން ދިނީ އެކަމަށް ބޭންކުން ހުށަހެޅި ބިޒްނަސް ޕްލޭން ދިރާސާ ކުރުމަށް ފަހުގައި ކަމަށެވެ. އޭނާ ވިދާޅުވީ ބޭންކްގެ ބިޒްނަސް ޕްލޭން އެކުލަވާލާފައި ވަނީ ވަރަށް ގިނަ ދުވަހުގެ ބުރަ މަސައްކަތާއި އެކުގައި ކަމަށެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވެސް ބުނީ އިސްލާމިކް ބޭންކިންގެ ބައެއް ހިދުމަތްތައް ދިނުމުގެ ހުއްދަ މިދިޔަ މަހުގެ 26 ވަނަ ދުވަހު ބީއެމްއެލްއަށް ދޫކޮށްފައިވާ ކަމަށެވެ.
ބީއެމްއެލް އިން ބުނީ އިސްލާމިކް ބޭންކިންގެ ހިދުމަތް ތައާރަފް ކުރުމަށް ކުރަން ޖެހޭ މަސައްކަތްތައް ވަރަށް ބާރަށް މިހާރު ކުރަމުން އަންނަ ކަމަށެވެ.
އެ ހިދުމަތް ބީއެމްއެލް އިން ތައާރަފްކުރަން މަސައްކަތް ކުރަމުން އަންނަތާ ވަރަށް ގިނަ ދުވަސް ވަނީ ވެފަ އެވެ.