މިދިޔަ ހަފުތާގައި ކުއްލި ގޮތަކަށް މަރުވި އިންޑިއާގެ މަޝްހޫރު ބަތަލާ ސްރީދޭވީ ހަޔާތުގެ މައްޗަށް ޑައިރެކްޓަރު ރާމް ގޯޕާލް ވަރްމާ (އާރްޖީވީ) ފިލްމެއް ހަދަން އުޅޭ ކަމަށް މީޑިއާތަކުން ރިޕޯޓް ކުރި ނަމަވެސް އެކަން އޭނާ ދޮގުކޮށްފި އެވެ.
"ސަތިޔާ" އާއި "ކޮމްޕެނީ" ފަދަ ފިލްމްތައް ގެނެސް ދިން ޑައިރެކްޓަރު މިއަދު ކުރި ޓްވީޓެއްގައި ބުނީ ސްރީދޭވީގެ މައްޗަށް ފިލްމް ހަދާ ވާހަކަ މީޑިއާތަކުން ދައްކާ އިރު، އޭނާގެ ރޯލް ކުޅޭނެ ފެންވަރުގެ ބަތަލާއަކު ނުލިބޭނެ ކަމަށެވެ. އެހެންވެ ސްރީދޭވީގެ ވާހަކަ ބޮޑު ސްކްރީނަށް ގެންނަން އުޅުމަކީ މޮޔަ ކަމެއް ކަމަށް ބުންޏެވެ.
Sections of media reporting I am making a biopic on sridevi is untrue ..I believe it’s foolish to attempt also because there cannot be any actress who’s remotely worthy enough to play her
— Ram Gopal Varma (@RGVzoomin) March 3, 2018
ނަމަވެސް ތެލެގޫ ޅެންވެރިޔާ ސިރަސްރީ ޓީވީ ޗެނަލަކަށް ދިން އިންޓަވިއުއެއްގައި ބުނީ ސްރީދޭވީގެ ހަޔާތަށް ހަދާ ފިލްމްގެ ވާހަކަ މިހާރު ލިޔަމުން އަންނަ ކަމަށާއި އެ ނިމުނުހާ އަވަހަކަށް، ފިލްމް ރަސްމީކޮށް އާރްޖީވީ އިއުލާން ކުރާނެ ކަމަށެވެ.
އާރްޖީވީ ވަނީ ސްރީދޭވީއާ އެކު ތެލެގޫ ފިލްމެއްގެ މަސައްކަތްކޮށްފަ އެވެ. އެއީ 1991 ގައި ރިލީޒް ކުރި ކްޝާނާ ކްޝަނަމް އެވެ.