ރޯޒް އެވެ. އަހަރެންގެ ނަމަކީ ސޯފިޔާ އެވެ. ރޯޒްއަށް އަހަރެން އެނގޭނެއެވެ. އަހަރެމެން ބައްދަލުވީ ފޭސްބުކްއިންނެވެ.
އަހަރެން ވަރުބަލިވެއްޖެ އެވެ. ހިކެން މަސައްކަތް ކޮށްކޮށެވެ. ތަފާތު އެތައް ބޭހެއް ކެވިއްޖެއެވެ. ނިކުތް ނަތީޖާ ހަމަ ސުމެކެވެ. މިކަމާ އަހަރެން ފިކުރު ބޮޑުވެ ހިތާމަ ކުރަނިކޮށް އަހަރެންގެ އެކުވެރި ފަރުހާ އަހަރެންނަށް ރޯޒްގެ އީމެއިލް އެޑްރެސް ދިނެވެ. މިކަމުގައި ހައްލެއް ހޯދުމަށް އަހަރެން ރޯޒްގެ އެހީ ބޭނުމެވެ. "އައްޑޫ ލައިވް" ގެ އެހީގައި ރޯޒްގެ ޖަވާބަކަށް އަހަރެންނާއި އަދި އަހަރެން ފަދަ އެތައް ދިވެހި އަންހެން ކުދިން އިންތިޒާރު ކުރާނެ އެވެ.
ޖަވާބު: ސޯފިޔާ އެވެ. ހިކުމަކީ ވަރަށް ހީވާގި މީހަކަށް މާކަ އުނދަގޫ ކަމަކަށް ނުވާނެ އެވެ. ތިރީގައި ބަޔާން މިކުރާ ކަންތަކުން ވެސް މިކަން ސޯފިޔާ މެނައް އެނގޭނެ އެވެ.
ރީތި އަދި ފުރިހަމަ ދުޅަހެޔޮ ސިއްހަތަކަށް ލޯބި ނުކުރާނީ ކާކު ހެއްޔެވެ؟
އާދެ ހަޔާތުގެ ކޮންމެ މަރުހަލާއެއްގައި މިކަމަށްޓަކައި ހަރެމެންނަށް މަސައްކަތް ކުރެވިދާނެ އެވެ.
މިސާލަކަށް:
* ލިފްޓުގެ ބަދަލުގައި ސިޑި ބޭނުން ކުރާށެވެ.
ސިޑިޔަކީ ކޮންމެތަނަކުންވެސް ފެންނާނެ އެއްޗެކެވެ. ދުވާލަކު 4 ފަހަރު 3ވަނަ ފުލޯޔާ 4 ވަނަ ފުލޯގެ ދެމެދު 4 ބުރުޖަހާށެވެ. ފުރަތަމަ ދުވަހުގެ އަދަދަށްވުރެ ދެވަނަ ދުވަހުގެ އަދަދު ގިނަ ކުރާށެވެ. ގާތްގަޑަކަށް 15 ދުވަހު މިގޮތަށް ކަންތައް ކުރަނިކޮއް ތަފާތު ފެންނަން ފަށާނެ އެވެ. މިހެން ސިޑިން އަރާފައިބާއިރު ތަންކޮޅެއް ހަލުއިކޮށް ވެސް އަރާ ފައިބަން ޖެހޭނެ އެވެ. ފަނަރަ ދުވަސް ތެރޭ 450 ކެލެރީ މަދުވެގެން ދާނެ އެވެ.
* ހިނގާލަން ދިޔުމަކީ އާދަޔަކަށް ހަދާށެވެ.
އަތިރިމަތި ނޫނީ ކަސްރަތުކުރުމަށް ހަދާފަހުންނަ ތަނައް ކޮންމެދުވަހަކު ހިނގާލަން ދިޔުމަކީ އާދަޔަކަށް ހަދާށެވެ. ސާޅީސް މިނެޓާއި 60 މިނެޓްގެ ވަގުތެއް މިކަމުގާ ހޭދަ ކުރާށެވެ. ހިނގަމުން ދާއިރު އަހަރެމެންގެ ވިންދު އަވަސްވާ މިންވަރަށް ވިސްނާށެވެ.
* ފަތަން ދިޔުމަކީ އާދަޔަކަށް ހަދާށެވެ.
ފެނަކީ އިންތިހާޔަށް ފަލަ މީހުންވެސް ހިއްކާދޭ އަދި ހަށިގަނޑު ރީތިކޮށްދޭ ވަރަށް ބޮޑު ބާރެކެވެ. ފެނުގެ ބައެއް ޓެންޕެރޭޗަތަކުގައި ހަށިގަނޑުގެ ބައެއްފެޓުސްތައް އަންދާލަ އެވެ. މީގެ ސަބަބުން އަހަރެމެންގެ ހަށިގަނޑުން 285 ކެލެރީ މަދުވެގެން ދާނެ އެވެ. ސަބަބަކީ ފެތުމުގެ ސަބަބުން ހަށިގަނޑުގެ ކޮންމެ ގުނަވަނަކަށް ކަސްރަތު ލިބިގެން ދާކަމަށްޓަކަ އެވެ.
* ވޮލީބޯޅަ ކުޅޭށެވެ.
ވޮލީއަކީ އަތަށާއި ފަޔަށް ވަރަށް ބޮޑު ކަސްރަތެއް ލިބިގެން ދާނެ ކުޅިވަރެކެވެ. އަދި މިކުޅިވަރު ކުޅުން ބޮޑަށް ރަނގަޅީ ފަސްމަޑު ބިމެއްގަ އެވެ.
* ކަސްރަތުގެ އިތުރުން ކެއުމައްވެސް ސަމާލުކަން ދިނުން މުހިއްމެވެ.
މެންދުރުގެ ކެއުމާއި ރޭގަނޑުގެ ކެއުމުގެ 5 މިނެޓު ކުރިން ފެން ތަށްޓެއް ނުވަތަ ޖޫސްތައްޓެއް ބޯލާށެވެ. ސަބަބަކީ ކެއުން ކޮންޓުރޯލް ކުރުމަށްޓަކަ އެވެ. ހެނދުނުގެ ކެއުމަށް ބިސްކޯދެއް ނުވަތަ ޕާންކޮޅެއް ބޭނުން ކުރާށެވެ. ގިނައިން ފެނާއި ޖޫސް ބޯށެވެ. ހެނދުނުގެ ނާސްތާ އާދަވެ ބޭނުން ކުރާށެވެ. ބޮޑަށް ރަނގަޅީ މެދުމިންވަރަކަށް ހެނދުނުގެ ކެއުން ހުރިއްޔާ އެވެ.
ތެލުގެ ގޮތުގައި ކާށި ތެޔޮ ބޭނުން ކުރަން އާދަ ކުރާށެވެ. ތެލުލާއި ފަހުންނަ ކާއެއްޗެތި ކެއުމުން ދުރުވާށެވެ. އަދި އެޔާ އެކު މާ ގިނަ ތެޔޮ ހުންނަ އެއްޗެތި ކެއުމުން ދުރުހެލިވާށެވެ. މިކަމުން އަހަރެމެންގެ ލޭގެ ބަލިތަކަށާއި ހަކުރުގެ ބަލިތަކަށް ފަރުވާއަކަށް ވާނެއެވެ.
ޑެޒަޓެއްގެ ގޮތުގައި އަބަދުވެސް ތާޒާ މޭވާ ބޭނުން ކުރަން އާދަ ކުރާށެވެ. ކާ ކޮންމެ އިރަކު ކޮންމެވެސް ވައްތަރެއްގެ ތާޒާ މޭވާއެއް ކާން އާދަ ކުރާށެވެ.
ހަމަ ޔަގީނު ވެސް މަތީގައިވާ ގޮތަށް އަމަލުކުރެވިއްޖެ ނަމަ މިހާރު ތި ލާން ގެންގުޅޭ ހެދުންތައް އިސާހިތަކު ބޮޑުވެ ކައިރިން ޖަހަން ޖެހޭނެ އެވެ. އަދި ދިރިއުޅުމުގެ އާހިޔްވަރެއް ލިބޭނެ އެވެ. ރީތި ބައްޓަމެއް ހުރި ހަށިގަނޑެއް ވެސް ލިބޭނެކަން ގައިމެވެ.