ދާދި ދެންމެއަކު ހިތަދޫން ކަރަންޓް ކެނޑި، މުޅި ރަށް އަނދިރިވެއްޖެ އެވެ.
އެ ރަށުން ވާހަކަ ދެއްކި ބައެއް މީހުން ބުނީ މުޅި ރަށް މިހާރު އޮތީ އެއްކޮށް އަނދިރިވެފައި ކަމަށެވެ.
"މުޅި ރަށް މިއޮތީ އެއްކޮށް އަނދިރީގައި. މަގުމަތިން ދުއްވާ ވެހިކަލްތަކުގެ އަލިކަން މި ވަގުތު ހަމައެކަނި ފެންނަނީ،" ހިތަދޫން ވާހަކަ ދެއްކި މީހަކު ބުންޏެވެ. "އަނެއްކާ މިރޭ މުޅި ހަތަރުދަން މި ހާލުގައި ކަންނޭނގޭ އަހަރެމެން އުޅެން ޖެހޭނީ. މިއޮތީ ވަރުގަދަ ކަމެއް."
ފެނަކަ ހިތަދޫ ބްރާންޗްގެ އޮފިޝަލަކު ވިދާޅުވި ގޮތުގައި މިރޭ ކުއްލި ގޮތަކަށް ހިތަދޫން ކަރަންޓް ކެނޑުނީ އަލަށް ބެހެއްޓި ދެ ޖަނެރޭޓަރުގެ ތެރެއިން އެކައްޗަށް ދިމާވި މައްސަލައަކާ ގުޅިގެންނެވެ.
އެހެންވެ އެކަން ހައްލު ކުރަން މިހާރު މަސައްކަތް ކުރަމުން އަންނަ ކަމަށް ވިދާޅުވި އެވެ.
ހިތަދޫ ބޭރުމަތި ސަރަައްދުގައި މިއަދު އިތުރު ޓްރާންސްފޯމަރެއް ބަހައްޓާތީ ހެނދުނު ކަރަންޓް ކެނޑޭނެ ކަމަށް ފެނަކައިން އަންގާފައިވެ އެވެ.
އައްޑޫން ކަރަންޓް ކެނޑޭ މައްސަލަ ހައްލު ކުރުމަށް ދެ މެގަވޮޓްގެ އާ ޖަނަރޭޓަރު ބެހެއްޓި ނަމަވެސް، އެ ތަކެތި ދޭތެރެ ދޭތެރެ އިން ފެއިލްވެ، ކަރަންޓް ކެނޑޭ މައްސަލަ ބޮޑެވެ.
ހިތަދޫން މިރޭ ކަރަންޓް ކެނޑުނު ނަމަވެސް، ގުޅިފައިވާ އެހެން ރަށްތަކުން ކަރަންޓް ނުކެނޑޭކަން ފާހަގަކޮށްލެވެ އެވެެ.