އުއްތަމަ ފަނޑިޔާރު އަބްދުﷲ ސައީދުގެ އަނބިކަނބަލުން މޫމިނާ ނާފިޒް އިދިކޮޅު ޕާޓީތަކުން އިއްޔެ ބޭއްވި އެއްވުމުގައި ބައިވެރިވެވަޑައިގެންފިއެވެ. މިއީ ސިޔާސީ ހަރަކާތެއްގައި މޫމިނާ ބައިވެރިވަޑައިގެންނެވި ފުރަތަމަ ފަހަރެވެ.
އުއްތަމަ ފަނޑިޔާރުގެ އަނބިކަނބަލުން ސިޔާސީ ހަރަކާތްތެއްގައި ބައިވެރިވަޑައިގެންފައި ވާއިރު އެކި ތުހުމަތުތަކުގައި ހައްޔަރުގައި ތިއްބެވި ސިޔާސީ ބޭފުޅުންގެ އަނބިކަނބަލުން ގެންދަވަނީ މުޒާހަރާތަކުގައި ބައިވެރިވަމުންނެވެ.
ވެރިކަން ވައްޓާލަން އުޅުމާއި ރިޝްވަތުގެ ތުހުމަތުގައި ހައްޔަރުކޮށްފައިވާ އުއްތަމަ ފަނޑިޔާރު އަބްދުﷲ ސައީދާ ދޭތެރޭގައި ސަރުކާރުން އަމަލުކުރަނީ ވަރަށް އިހާނެތިކޮށް ކަމަށް އެމަނިކުފާނުގެ ގާނޫނީ ވަކީލުން ވަނީ ބުނެފައެވެ.
ސުޕްރީމް ކޯޓު ތެރޭގައި އިންނަވަނިކޮށް، އުއްތަމަ ފަނޑިޔާރު ހައްޔަރުކުރީ، ފެބްރުއަރީ މަހުގެ 5 ވަނަ ދުވަހުގެ ރޭ، ރައީސް އަބްދުﷲ ޔާމީން ކުއްލި ނުރައްކަލުގެ ހާލަތު އިއުލާން ކުރެއްވުމުން، ސިފައިންނާއި ފުލުހުން އެ ރޭ ސުޕްރީމް ކޯޓު ތެރެއަށް ވަދެ އެވެ. ސިފައިންނާއި ފުލުހުން ސުޕްރީމް ކޯޓުގެ ތެރެއަށް ވަނީ އެ ކޯޓުގެ ފުރާޅުން ޓިނު ނައްޓައިގެންނެވެ.