ޕީޕީއެމްގެ ބައެއް މަޖިލިސް މެންބަރުން ރައީސް ޔާމީންގެ އުނދަގޫ އެވާހަކަ ދައްކަވާތާ ގިނަ ދުވަސްތަކެއް ވެފައިވާ ކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިޑާޅުވެއްޖެއެވެ.
މިވަގުތު ޖަރުމަނުވިލާތުގައި ހުންނެވި ގާސިމް އިބްރާހިމް މިގޮތަށް ވިދާޅުވީ ރޭގެ ވަގުތެއްގައި 'ވީޓީވީ' އަށް ދެއްވި އިންޓަވިއު އެއްގައެވެ.
ގާސިމް އިބްރާހިމް ވިދާޅުވި ގޮތުގައި އެބޭފުޅާ އާއި ބެހޭގޮތުން ދޮގު ވާހަކަތައް ފަތުރަމުންގެންދަވާ އަބްދުއްރަހީމާއި، ނިހާނާއި، ޚަލީލު އަދި އަލީ އާރިފް އަކީ ރައީސް ޔާމީން ގެންގުޅުއްވާ "ތާޅަފިލިތަކެއް" ކަމަށެވެ.
"އަބްދުއްރަހީމް، ނިހާން، ޚަލީލު، އާރިފުއަށް ޔާމީންގެ އުނދަގޫ ބޮޑުވެގެން އަޅުގަނޑުގާތު ކިޔާތާ ކިޔަންމެ ދުވަހެއް. ޔާމީނުގެ އުނދަގޫ ބޮޑުކަމުން، އުޅެވޭ ވަރެއްނުވެޔޭ، މިއީ އުޅެވޭވަރު ތަނެއްނޫނޭ، ޖޭޕީއަށް ގެންދެބަލާށޭ ކިޔާތާ ކިތަންމެ ދުވަހެއް." ޤާސިމް ވިދާޅުވިއެވެ.
ޤާސިމް ވިދާޅުވި ގޮތުގައި ރައީސް ޔާމީން އެދިވަޑައިގަންނަވާ ގޮތަކަށް އެބޭފުޅުން ވާހަކަ ދައްކަވަނީ އެބޭފުޅުން ބޭނުންވެގެން ނޫން ކަމަށާއި އެވާހަކަ އެތައް ފަހަރަކު އެމަނިކުފާނަށް ދަންނަވާފައިވާ ކަމަށެވެ.