އިއްޔެ ޕީޕީއެމްގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ފޮނަދޫ ދާއިރާގެ މަޖިލިސް މެންބަރު އަބްދުއްރަހީމް(އަދުރޭ) ވިދާޅުވެފައިވާ ގޮތުގައި ޖޭޕީގެ ލީޑަރު ޤާސިމް އިބްރާހިމް ވަނީ އެބޭފުޅާއަށް ގުޅުއްވައި ވަރަށް އާދޭސް ކުރައްވާފައެވެ.
އަދުރޭ ވިދާޅުވި ގޮތުގައި، ފުލުހުންގެ ބަންދުގައި ހުރި ޤާސިމްގެ ދޮށީ ފިރިހެން ދަރިކަލުން އިބްރާހިމް ސިޔާދު ޤާސިމް ޖަލުން ދޫކޮށްދީފިނަމަ ހަމަ ވަގުތުން ޕީޕީއެމް އާއި ގުޅޭނެކަމަށް ފޯނުން ގުޅުއްވައި ޤާސިމް ވަނީ ވިދާޅުވެފައެވެ. އަދި މީގެ އިތުރުން "އާދޭސްކުރެއްވުމުގެ" ގޮތުން ޤާސިމް ޓެކްސްޓް މެސެޖްތަކެއް ފޮނުއްވި ކަމަށް ވެސް އަދުރޭ ވިދާޅުވިއެވެ.
ހަމައެކަނި ދައުލަތުގެ މީޑިޔާ ޕީއެސްއެމްއާއި ޗެނަލް13 ބައިވެރިވި އެ ނޫސްވެރިންގެ ބައްދަލުވުމުގައި އަދުރޭ ވިދާޅުވީ، ފެބްރުއަރީ 3 ފަހަރެއްގައ މަތިން ޖަރުމަނުގައި ހުރެގެން ގާސިމް ފޯނުކުރައްވައި ވާހަކަ ދެއްކެވިކަން ހެކިވާނެ މީހުން އެބަ ތިބި ކަމަށާއި، އޭގެ ތެރޭގައި ޕީޕީއެމްގެ މެމްބަރުންނާއި ދައުލަތުގެ ވަޒީރުންވެސް ހިމެނޭ ކަމަށެވެ. އެހެން ނަމަވެސް އެއީ ކޮން ވަޒީރުންނެއް އަދި މެންބަރުންނެއް ކަމެއް އަދުރޭ ވިދާޅެއް ނުވެއެވެ.
މީގެ އިތުރުން ޤާސިމް މެސެޖުތަކެއް ކުރެއްވި ކަމަށާއި މީޑިޔާގެ ބޭފުޅުން ބައްލަވަން ބޭނުންފުޅުވާ ނަމަ ފޯނު ދައްކަވާނެ ކަމަށް ވެސް އަދުރޭ ވިދާޅުވިއެވެ. އެހެން ނަމަވެސް ނޫސްވެރިންގެ ބައްދަލުވުމުގައި ވެސް އަދި އޭގެ ފަހުން ވެސް އެ މެސެޖްތަކެއް ނޫސްވެރިންނާއި ހިއްސާކޮށްފައެއް ނުވެއެވެ.
މީޑިޔާ ބޭފުޅުންނަށް ފޯނު ދައްކަން ތައްޔާރަށް ހުންނެވި ކަމަށް އަދުރޭ ވިދާޅުވި ނަމަވެސް މިހާތަނަށް އެކަން ކުރައްވާފައެއް ނުވެއެވެ.
އެކަމާއި ގުޅިގެން އަދުރޭ އަށް ފާޑުކިޔާ ފަރާތްތަކުން ބުނަމުން ގެންދަނީ ޤާސިމް މެސެޖު ފޮނުއްވި ކަމަށް ވިދާޅުވެ އަދުރޭ ހައްދަވަނީ އިތުރުފުޅެއް ކަމަށެވެ.