ޕީޕީއެމްގެ ޓިކެޓްގައި ރައްޔިތުންގެ މަޖިލީހަށް ވާދަކޮށްފައިވާ އަދި މިހާރު ވެސް އެޕާޓީގެ ކެމްޕެއިންތަކުގައި ވަރަށް ބުރަކޮށް މަސައްކަތް ކުރައްވާ އަހުމަދު ޝަރީފް، އިލެކްޝަންސް ކޮމިޝަނުގެ މެންބަރުކަމަށް އައްޔަންކުރުމަށް މަޖިލީހުގެ ކޮމެޓީއަށް ފޮނުވާފިއެވެ.
ޝަރީފުގެ ނަން ދިރާސާ ކުރުމަށް ކޮމިޓީއަށް ފޮނުވުމަށް ފަހު މަޖިލީހުގެ މިއަދުގެ ޖަލްސާ ނިންމާލި އިރު އެޖަލްސާ ކުރިއަށް ގެންދިޔައީ އެންމެ 5 މިނިޓަށެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރ ކަމުގެ މަޤާމުގައި ހުންނެވި ޝަރީފް މަގާމުގެ ނުފޫޒު ނާޖާއިޒު ގޮތުގައި ބޭނުން ކުރައްވައިގެން 2017 ވަނަ އަހަރުގެ ލޯކަލް ކައުންސިލް އިންތިހާބަށް ނުފޫޒު ފޯރުވި ކަމަށް ބުނެ، އެމްޑީޕީން ވަނީ އެންޓި ކޮރަޕްޝަން ކޮމިޝަން (އޭސީސީ) އަށް މައްސަލަ ހުށަހަޅާފައެވެ.
އެމްޑީޕީން ހުށަހެޅި މައްސަލާގައި ބުނެފައިވާ ގޮތުގައި ކެންޑިޑެސީ ދޫކޮށްލާ ކެންޑިޑޭޓުންނަށް ބަދަލެއްގެ ގޮތުން ސަރުކާރުގެ ތެރެއިން ވަޒީފާ ހަމަޖައްސައިދެއްވާނެ ކަމަށް ޝަރީފް ވަނީ ވިދާޅުވެފައެވެ.