އިނގިރޭސި ޕްރިމިއާ ލީގުގައި އާސެނަލް ޖެހިޖެހިގެން ހަތަރު ވަނަ މެޗުން ބަލިވެ ސަޕޯޓަރުން ރަތަށް އަރައި، މުޅި ޓީމުވެސް ބޮޑު ލަދެއްގައި ބެދިއްޖެއެވެ.
ރޭ ލީގުގައި ބްރައިޓަން އާ ދެކޮޅަށް ކުޅުނު މެޗުން އާސެނަލް ބަލިވެފައިވަނީ 1-2 އިންނެވެ. ބްރައިޓަންއިން މެޗުގެ ވަރަށް ކުރީކޮޅު ދެލަނޑު ޖަހައި ލީޑު ނަގާފައިވާއިރު އާސެނަލް ޓީމުގެ ފަރާތުން ރޭ ވެސް ފެނިގެން ގޮސްފައިވަނީ އާދައިގެ ކުޅުމެކެވެ.
ބްރައިޓަންގެ ގޯލުތަން ޓީމުގެ ކެޕްޓަން ޑަންކް އަދި މަރޭ ކާމިޔާބުކޮށްފައިވާއިރު އާސެނަލްގެ ހަމައެކަނި ލަނޑަކީ އައުބަމަޔެންގް ކާމިޔާބުކުރި ލަނޑެކެވެ.
ފާއިތުވެދިޔަ ތިން ސީޒަނުގައި އާސެނަލްގެ ފަރާތުން އެދެވޭ ކުޅުމެއް ނުފެންނާތީ ސަޕޯޓަރުން އަންނަނީ ކޯޗު ވެންގާ މަގާމުން ދުރުކުރުމަށްފަހު އާ ކޯޗަކު މަގާމަށް ގެނައުމަށެވެ. މިދިޔަ ސީޒަނުގައި ކުލަބަށް ލީގު ތާވަލުގެ ގަދަ ހަތަރެއްގައި ނުހިމެނި ޗެމްޕިއަންސް ލީގުން ޖާގައެއް ނުލިބުމުން ސަޕޯޓަރުން ބޭނުންވީ އާސީޒަނަށް އާ ކޯޗެއް ގެނައުމަށެވެ.
ނަމަވެސް އާސެނަލްގެ ވެރިން ވަނީ ވެންގާއަށް އިތުރު އެއް އަހަރު ކޯޗުގެ މަގާމުގައި ހުރުމަށް ފުރުސަތު ދީފައެވެ. މިސީޒަނުގައި އިތުރު ގޮންޖެހުންތަކާ ވެންގާއަށް ކުރިމަތިވެފައިވާއިރު ސީޒަން ފެށުނުއިރު ކުލަބު ރެކޯޑަކަށް ވަނީ ފޯވާޑް ލަކަޒެޓް ކުލަބަށް ގެނެސްފައެވެ.
ނަމަވެސް އޭނާއަށް ސީޒަން ފޫނުބެއްދުމުން ޖެނުއަރީ ޓްރާންސްފާގައި އަނެއްކާވެސް ރެކޯޑު މުގުރާލުމަށްފަހު ބޮރޫޝިޔާ ޑޯޓްމަންޑްގެ ފޯވާޑް އޯބާމަޔެންގް ވަނީ ގެނެސްފައެވެ. އޭނާ އައުމުން އާ އުއްމީދެއް ކުލަބަށް ލިބުނު ނަމަވެސް ފެނިގެން ދިޔައީ ފުލުފުލުގައި ބަލިވާން ފެށިތަނެވެ.
ލީގު ތާވަލުގެ ހަވަނައަށް ވެއްޓި، ލީގު ކަޕް ފައިނަލުން ކަޓައި، ޔޫރޮޕާ ލީގުގައިވެސް އުއްމީދު ގެއްލުމުން އާސެނަލް ސަޕޯޓަރުން ބޭނުންވަނީ މިހާރުއްސުރެ އަންނަ ސީޒަނުގައި ވެންގާ ވަކިކުރުމުގެ ނިޝާނެއް ކުލަބުން ދިނުމެވެ.