ކުއްލި ނުރައްކަލުގެ ހާލަތުގެ ދަށުން ހައްޔަރުކޮށްފައިވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު، އަހުމަދު މަހްލޫފަށް ސިފައިންނާ މާރާމާރީ ހިންގިކަމުގެ ތުހުމަތުކޮށް، ސުވާލުކޮށްފިއެވެ.
މަހްލޫފުގެ މައްޗަށް ކޮށްފައިވަނީ މިދިޔަ އަހަރުގެ ޖުލައި 31 ވަނަ ދުވަހު ސަލާމަތީ ބާރުތަކާއި ރައްޔިތުންގެ މަޖިލީހުގެ މެމްބަރުންނާ ދެމެދު ހިނގި ހަމަނުޖެހުން ތަކުގައި، ސިފައިންނާ މާރާމާރީ ހިންގިކަމުގެ ތުހުމަތެވެ.
އެދުވަހު މަހްލޫފް ހަރަކާތްތެރިވެފައިވަނީ ސިފައިންނާއި ފުލުހުންގެ އޮފިސަރުންނާއި، ގާނޫނު ހަދާ މަޖިލީހުގެ މެމްބަރުން، މަޖިލިހަށް ވަންނަން މަސައްކަތް ކުރުމުން އެބޭފުޅުން ނުވައްދައި ދެފަރާތުގެ ދެމެދުގައި ހިނގި ކުރިމަތިލުން ފޭސްބުކް ލައިވް މެދުވެރިކޮށް އާންމުންނާ ހިސާބަށް ގެނައުމުގައެވެ.
އެގޮތުން ދެފަހަރެއްގެ މަތިން މަހްލޫފް ގަދަ ބާރުން މަޖިލިސް އިދާރާއިން ސިފައިން ބޭރުކޮށްފައިވާއިރު އޭނާ ދިޔައީ އޭރުވެސް އެމަންޒަރުތައް ލައިވް ކުރަމުންނެވެ. ލައިވް ކުރި މަންޒަރުތަކުން މަހްލޫފާ ސިފައިންނާ ދޭތެރޭ މާރާމާރީގެ އެއްވެސް އަމަލެއް ހިނގާފައިނުވާކަން ފާހަގަކޮށްލެވެއެވެ.
ސިފައިންނާއި މާރާމާރީ ހިންގި ކަމަށް ބުނާ މައްސަލާގައި މަހްލޫފާ ސުވާލުކުރަނީ ގާނޫނުލްއުގޫބާތުގެ 532 ވަނަ މާއްދާގެ (ހ)ގައި ބުނާ ގާނޫނު ތަންފީޒުކުރާ މުވައްޒަފަކު ރަސްމީ ހައިސިއްޔަތުން ކުރުން ހުއްދަ ކަމެއް ކުރުމަށް ހުރަސް އެޅުން ނުވަތަ ހުއްޓުވުމުގެ ތުހުމަތުގައި އާއި، ގާނޫނުލްއުގޫބާތުގެ 533 ވަނަ މާއްދާގެ (ހ)ގައި ބުނާ ތިމާއަށް އެނގި ހުރެ ގާނޫނުގެ ބާރު ހިންގުމަށް ނުވަތަ ދައުލަތުގެ މަސައްކަތް ކުރުމަށް ހުރަސް އެޅުމާއި އެކަން ވިޔަ ނުދިނުމަށް މަސައްކަތް ކުރުމުގެ ތުހުމަތުގައި އާއި އަދި ގާނޫނުލްއުގޫބާތުގެ 120 ވަނަ މާއްދާގެ (ހ)ގައި ބުނާ މީހެއްގެ ރުހުމަކާއި ނުލައި އޭނާ ގައިގައި އަތްލުމުގެ ތުހުމަތުގަ އެވެ.
މިތުހުމަތުތަކާ ގުޅިގެން މަހްލޫފްގެ ވަކީލުން އަދި އެއްވެސް އެއްޗެއް ހާމަކޮށްފައިނުވާއިރު ފުލުހުން ބާރުގެ ބޭނުންކޮށްގެން އެމްޑީޕީ ހަރުގެ ތެރެއަށް ވަދެ، މަހްލޫފް ހައްޔަރުކޮށްފައިވަނީ މިދިޔަ ފެބްރުއަރީ މަހުގެ 22 ވަނަ ދުވަހުގައެވެ.
މަހްލޫފާ ހަވާލާދީ އޭނާގެ އާއިލާއިން ބުނެފައިވާ ގޮތުގައި 28 ދުވަހު ބަންދުގައި ބަހައްޓާނެ ކަމަށް އޭނާ ވަނީ އަންގާފައެވެ.