މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަން (އެމްއާރްޑީސީ) ގައި މަސައްކަތް ކުރި ގިނަ އަދަދެއްގެ މުވައްޒިފުންނާއި މަސައްކަތްތައް ހައުސިން މިނިސްޓްރީގެ ޕަބްލިކް ވޯކް ސާވިސެސްގެ ދަށަށް ބަދަލުކޮށްފިއެވެ.
މިދިޔަ މަހުން ފެށިގެން އެމްއާރްޑީސީގެ ބިޒްނަސް ޑިވެލޮޕްމެންޓް ފިޔަވައި އެހެން ހުރިހާ ޑިޕާޓްމަންޓްތައް ވަނީ ހައުސިންގެ ދަށަށް ބަދަލުކޮށްފައެވެ. އަދި މާލޭގައި އެމްއާރްޑީސީ އޮފީސް ހުރިތަނުގެ ނަން ބޯޑުވެސް ވަނީ ޕަބްލިކް ވޯކް ސާވިސެސްއަށް ބަދަލުކޮށްފައެވެ.
އެމްއާރްޑީސީ އަކީ ރާއްޖޭގެ ހުރިހާ ރަށެއްގެ މަގު ހެދުމާއި ފުޓުބޯޅަ ދަނޑުތައް ބެލެހެއްޓުމާއި ނަރުދަމާގެ މަސައްކަތް ކުރަމުންދިޔަ ކުންފުންޏެވެ. ކުންފުނި އުވާލީ ކޮން ސަބަބަކާ ގުޅިގެން ކަމެއް ސަރުކާރުން ހާމަކޮށްފައެއް ނުވެއެވެ.
އެމްއާރްޑީސީ އުވާލައި، މުވައްޒިފުން ހައުސިން މިނިސްޓްރީގެ ދަށަށް ބަދަލުކުރުމުން ބައެއް މުވައްޒިފުން ވަނީ ހިތްހަމަނުޖެހުން ފާޅުކޮށްފައެވެ. މުސާރައަށް އަންނާނެ ބަދަލާއި އެހެނިހެން ބަދަލުތަކުގެ ސަބަބުން މުވައްޒިފުންގެ ޝަކުވާތައް އިތުރުވަމުން އަންނަކަން ފާހަގަކޮށްލެވެއެވެ.