ދާދި ފަހުން އަޑު އިވުނީ އައްޑޫސިޓީ ކައުންސިލުން ލޯންޗެއް ގަންނަން އުޅޭ ޙަބަރެވެ. މިއީ ގިނަ އަދަދަކަށް ރައްޔިތުންގެ ލާރި އެކަމުގައި ޝާމިލު ވާ ކަމެކެވެ.
ކައުންސިލުން މަޢުލޫމާތު ދޭގޮތުގައި ކައުންސިލުން ލޯންޗު މިގަންނަނީ ކައުންސިލުން ހުޅުމީދޫ އަށް ދަތުރު ކުރުމަށާއި، އެމަރޖެންސީގައި ހުޅުމީދޫއިން މީހުން ހިތަދޫ ހޮސްޕިޓަލަށް ގެންދިޔުމަށެވެ. މިއީ މުހިންމު ދެކަމެކެވެ. ނަމަވެސް އުފެދޭ ސުވާލަކީ މިދެކަމަށް ލުއި ފަސޭހަ ގޮތެއް ހޯދަން މިވަގުތަށް ކުރަން އެންމެ ރަނގަޅު ކަމަކީ 2.1 މިލިއަން ރުފިޔާގެ ލޯންޗެއް ގަތުން ތޯއެވެ؟
ބޮޑު މަޝްރޫއެއް ހިންގާނަމަ އަބަދަވުސް ކޮސްޓް – ބެނިފިޓް އެނަލިސިސް ހެދުމަކީ ސަރުކާރުން ވެސް އަދި އެހެން ތަންތަނުން ވެސް ކުރާކަމެެވެ. "ކޮސްޓް- ބެނިފިޓް އެނަލިސިސް" ނޫނީ "ސީބީއޭ" އަކީ މަޝްރޫއެއް ހިންގުމުގެ ކުރިން، އެ މަޝްރޫއަށް ހިނގާ ޙަރަދާއި އެ މަޝްރޫއެއް ހިންގުމުން ލިބޭނެ ފައިދާތަށް އަންދާޒާކޮށް އަޅާ ކިޔުމެވެ. އަދި އެ ނަތީޖާއެއް ހާސިލު ކުރަން އެ މަޝްރޫއެއްގެ ބަދަލުގައި ހިންގިދާނެ އިތުރު ކަންކަން ދިރާސާ ކުރުމެވެ. އެކަމެއް ހިންގަން ކުރެވޭ ހޭދަތައް ލިބޭނެ ފައިދާތަކާއި ހަމަ ނޫންނަމަ، އެ މަޝްރޫއެއް ނުހިންގާނެއެވެ. މި ގޮތަށް އެނަލިސިސް ހެދުމުގެ ބޭނުމަކީ އެންމެ ޙަރަދު ކުޑަކޮށް އެންމެ ރަނގަޅަށް ނަތީޖާ ހާސިލު ކުރުމެވެ.
ބޮޑު އަގު ދީފައި ލޯންޗެއް ގަންނަ އިރު މިފަދަ ދިރާސާ ތަކެއް ކައުންސިލުން ކުރުން މުހިންމެވެ. ކައުންސިލުން މިހާރު ހުޅުމީދޫއަށް ދަތުރު ކުރަން ޖެހެނީ ކިހާވަރަކަށް ތޯ ބަލަން ޖެހެއެވެ. އަދި އެމަރޖެންސީގައި ހުޅުމީދޫއިން ހިތަދޫއަށް ބަލި މީހުން ގެންނަނީ ކިހާވަރަކަށް ކަން ދިރާސާކުރަން ޖެހެއެވެ. މިހާރުވެސް ފެރީއިން ދަތުރު ކުރެވެން އޮވެއެވެ. ކުއްޔައް ލޯންޗު ދަތުރުކޮށްދޭ ފަރާތްތަށް އެބަ ތިއްބެވެ. ކައުންސިލުން ކުރަންޖެހޭ މުހިންމު ދަތުރުތަށް ކުއްޔަށް ލޯންޗުހިފައިގެން ކުރުމަކީ ވެސް ކުރެވިދާނެ ކަމެކެވެ. މި ކަންކަން ހައްލު ކުރުމަށް އިތުރަށް ކުރެވިދާނެ ކަންކަން ރަނގަޅަށް ބަލައި ދިރާސާ ކުރަންޖެހެއެވެ.
ކައުންސިލުން މި ނިންމުން ނިންމާފައި މިވަނީ މިފަދަ މާ ބޮޑު ދިރާސާ އަކާއި ނުލައެވެ. އާންމުކޮށް ކަންކަން ނިންމާ އުސޫލުން 6 ބޭފުޅުން އެއްވެ ވިސްނުމެއް ފިކުރެއް ނެތި ޤަރާރެއް ފާސްކޮށްލީއެވެ. މި ކަން ކުރަން ނިންމި އިރު ރައްޔިތުންނަށް މިވަގުތަށް ބޭނުންވާ ގިނަ ކަންތައްތަކެއް އެބަހުއްޓެވެ. މަގު ހެދުމާއި، މަގު ބައްތި ޖެހުމާއި، ކުނީގެ މައްސަލަތަށް ހައްލު ކުރުންފަދަ ބޮޑެތި ކަންތައްތައް ހުއްޓާ ލޯންޗެއް ގަންނަން ނިންމުމަކީ ތާކުންތާކު ނުޖެހޭކަމެކެވެ.
ލޯންޗު ގަންނަން އުޅޭއިރު ކަންބޮޑުވާ އެހެން ކަމެއްވެސް އެބައޮތެވެ. މިހާރުވެސް ކައުންސިލްގެ ބެލުމުގެ ދަށުގައި ހުރި ގިނަ ތަކެތި ބޭނުން ކުރަނީ ނަހަމަ ގޮތުގައެވެ. މިސާލަކަށް ދައުލަތުގެ ކާރުތަށް ބޭނުން ކުރަނީ ހިތުހުރި ގޮތަކަށެވެ. ހަވީރު ފިނިބުރު ޖަހަންދަނީވެސް މި ކާރުތަކުންނެވެ. ކަން މިހެން އޮތް އިރު، ލޯންޗެއް ގެންސްފިނަމަ ކަންތައްތައް ވާނެ ގޮތް ތަސައްވަރު ކުރެވެއެވެ. އަންނަ ރޯދަ މަހަށް ޕިކުނިކު ހަދާލަންވެސް މި ލޯންޗުން ނުދާނެއެކޭ އަޅުގަނޑުގެ ހިތެއް ނުބުނެއެވެ.
މި ނިންމުން ނިންމާފައި މިވަނީ ރައްޔިތުންގެ ބަހެއް އެކަމުގައި ނެތިއެވެ. އަދި ބަލަންޖެހޭ ވަރަށް ނުބަލައެެވެ. އެހެން ކަމުން އަޅުގަނޑުވެސް މިކަންތަކާއި މެދު "ކަންބޮޑުވުން" ފާޅު ކުރަމެވެ. އަދި ވަރަށް "ހަރު އަޑުން" ކުއްވެރި ކުރަމެވެ.