އައްޑޫސިޓީ ކައުންސިލުން ކުރަނީ ކޮންކަމެއް ތޯ ކައުންސިލަރެއްގެ ގާތުން އަހައިފިނަމަ ލިބޭނެ ޖަވާބަކީ ކޮންމެވެސް މޮޅު ކަމެއް ކުރަން މަޝްވަރާ ކުރެވުނު ވާހަކަ އެވެ.
އަބަދުވެސް ކޮންމެވެސް ކަމެއް "ޑިސްކަސްކޮށް" އަދި "މީޓިން" ބާއްވާ ވާހަކަ އެވެ. ނަމަވެސް މިހާތަނަށް އެއިން "މީޓިން" އަކުން ކުރެވުނު "ޑިސްކަސް" އަކުން ވީ ފައިދާއެއް ފެންނާކަށް ނެތެވެ.
އައްޑޫ ރައްޔިތުން ވޯޓު ދީގެން ކައުންސިލެއް ހޮވީ ވަރަށް ފޮނި އުންމީދު ތަކާއި އެކުގައެވެ. "އެއް ވިސްނުމެއްގައި ފަންނީ ރޭވުންތެރި ކަމާއި އެކު އައްޑޫސިޓީ ކައުންސިލުގައި ރައްޔިތުންނަށް ޙިދުމަތް" ކޮށްދޭނަމޭ ކިޔާ ދެއްކި މޮޅު ވާހަކައިގެ ހަނދާން އެބަހުއްޓެވެ.
"އާންމު ދިރިއުޅުން ރަނގަޅުކޮށް އުފާވެރި އާއިލާ އަކަށް" ތިމަންނަ އަށް ވޯޓު ދޭށޭ ބުނި ހަނދާންވެސް އަދިވެސް އެބަހުއްޓެވެ.
އިންތިހާބުވެ، ދައުރު ނިމެން ކައިރި ވިއިރުވެސް އަދިވެސް މިދައްކަނީ އޭރުވެސް ދެއްކި ވާހަކައެވެ. އާންމު ހާލަތު ރަނގަޅު ކުރާވާހަކައެވެ. ރައްޔިތުންގެ ފަރާތުން ސިޓީގެ ތަސައްވަރު ފުރިހަމަ ކުރުމުގެ ވާހަކައެވެ. އަދިވެސް މިކަންތައްތައް ކުރަން "ޑިސްކަސް" ކުރުމުގައެވެ. އަމަލީ ސިފައެއް މިއިން އެއްވެސް ކަމަކަށް ނާދެއެ ވެ.
ރައްޔިތުންގެ އާންމު ހާލަތު އިހުނަށްވުރެ ދަށެވެ. އުފާވެރި ރައްޔިތެއް އުޅޭ ތަނެއްހެން އައްޑޫސިޓީ ހިޔެއްނުވެއެވެ. ރައްޔިތުން އަބަދުވެސް އުޅެންޖެހެނީ ކޮންމެވެސް ބޭނުމެއް ނުފުދިގެން، މާޔޫސް ވެ ރުޅި ގަދަވެފައެވެ.
އެއް ވިސްނުމެއްގައި ހިދުމަތް ކޮށްދޭން ބުނި ކައުންސިލް، މިއަދު ތިބީ ހަފަރާތަށް އެބުރިގެންނެވެ. އެހެންވެ އެންމެން އެކައްޗެއް ކިޔާފައި ކުރިޔަށް އެންމެ ފިޔަވަޅެއްވެސް އަޅާނުލެވެއެވެ.
ދައުލަތުގެ ކާރުން ފިނި ބުރުޖެހުމާއި، ދައުލަތުގެ ހަރަދުގައި ދަތުރުކުރުން ނޫން ކަމެއް ނުކުރެވެއެވެ. އައިޕެޑެއް އޮވެގެން މެނުވީ ރައްޔިތުންނަށް ޙިދުމަތް ނުދެވޭނެއޭ ބުނެގެން ރައްޔިތުންވަނީ ރައްޔިތުންގެ ލާރިން ކޮންމެ ކައުންސިލަރަކަށް އައިޕެޑެއްވެސް ގަނެދީފައެވެ.
އެވަރުންވެ ސް ރައްޔިތުން އުޅެން މިޖެހެނީ ބިކަހާލުގައެވެ. "ގަދަ އަޒުމުގައި ސިޔާސީ ހިޔާލު ތަފާތުވުމުން އެކަހެރިވެ" ހިދުމަތް ކުރާނަމޭ ބުނި މީހުން، ޕާރޓީ ކުލަ ނޫން މީހަކާ ވާހަކަ ދައްކަންވެސް އުޒުރުވެރި ވެއެވެ. މިހާ ހިސާބަށް އައުމުން ކެމްޕެއިން ތެރޭ ދެއްކީ ހުސްވާހަކަ ކަން އެބަ އެނގެއެވެ. "ދާއިރާގެ ފިކުރަކީ މަގޭ ފިކުރޭ" ކިޔަމުން ދުވި ބޭފުޅާ ރައްޔިތުންނާއި ގުޅުމެއް ނޯވެއެވެ.
ކައުންސިލް ތަކަކީ ރައްޔިތުންގެ ބައިވެރިވުން ވަރަށް ބޮޑަށް ހިމެނިގެން ހިންގަން ޖެހޭ އެއްޗެކެވެ. ކޮންމެ ކަމެއް ނިންމާއިރު ރައްޔިތުންގެ ހިޔާލާ މަޝްވަރާ ހޯދަން ޖެހެއެވެ.
މިހާތަނަށް އާންމުކޮށް ހުޅުވާލެވިގެން ތަރައްޤީގެ މަޝްރޫއު ތަކާއި ގުޅޭގޮތުން މަޝްވަރާކުރަން ކައުންސިލުން ރައްޔިތުންނާއި ބައްދަލުކޮށްފައެއް ނެތެވެ. އިންތިހާބު ބޯމަތި ވެފައިވާތީ މާރުކޭޓު ހޮޓާ ފަދަ ތަންތަނުން، ދެނެ ފަރިތަ ބައެއް މީހުންނާ އަނގާތަޅާލަން ނުދާ ވާހަކައެއް ނޫނެވެ.
ކޮންމެ އަކަސް ދައުރު ނިމެން ކައިރި ވީއީރު ރައްޔިތުންގެ ހެވާއި ލާބައަށް ކުރެވުނު އެއްވެސް ކަމެއް ނެތެވެ. ހޮވާފަ ތިބި 6 މީހުން ހަމަޔަށް އެއްތަންވަނީ ވެސް މަދު ފަހަރެއްގައެވެ.
ދައުރު ނިމޭ އިރުވެސް ކަންކަން "ޑިސްކަސް" ކުރަނީ އެވެ. އިންތިހާބު ވީ ދުވަހުން ފެށިގެން އިންވެސްޓަރުން ހޯދަނީއެވެ. އަދިވެސް އެއިން އިންވެސްޓަރަކު އީކުއޭޓާރ ރޮނގުން ދެކުނަކަށް ނާދެއެވެ.
ކުނިން ކަރަންޓު އުފައްދާނަމޭ ކިޔާ ކޮސް ވާހަކައެއް ދެއްކުމަށް ފަހު، ކޮންމެވެސް ދެތިން ހަތަރު ކަމަކާ ކަންބޮޑުވުން ފާޅުކޮށް، އެހެން ކޮންމެވެސް ކަމެއް "ހަރު އަޑުން" ކުށްވެރިކޮށްފައި ހަވީރު ގަޑީގައި މަހަށް ދިޔުން ނޫން ކަމެއް ކައުންސިލަރުންނަކަށް ނުވެ އެވެ.