ހިތަދޫ ބޭރުމަތި ހިސާބުގައި އަލަށް ބެހެއްޓި ޓްރާންސްފޯމަރަށް މައްސަލަތަކެއް ޖެހުމުގެ ސަބަބުން ކަރަންޓު ކެނޑިފައިވާތީ ހިތަދޫގެ ގެސްޓް ހައުސްތަކުން ކަންބޮޑުވުން ފާޅުކުރަމުން އެބަދެއެވެ.
ހިތަދޫގެ ބޭރުމަތި ހިސާބުން ކަރަންޓު ކެނޑުމުގެ ސަބަބުން 'ޕެބްލްސް އިން' އަދި 'އަބުހަރީ ގްރޭންޑް' ގެސްޓް ހައުސްގައި ވެސް ކަރަންޓުގެ ޚިދުމަތް މެދުކެނޑިފައިވާތާ 4 ގަޑިއިރު ވަނީ ވެފައެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ޕެބްލްސް އިން އަދި އަބުހަރީ ގްރޭންޑް ގައި ވެސް މިވަގުތު ފަތުރުވެރިން އެބަތިއްބެވެ.
ހިތަދޫން ކަރަންޓު ކަނޑާއިރު ގެސްޓް ހައުސްތަކާއި ހޮސްޕިޓަލުން ކަރަންޓް ނުކެނޑުމަށް ޚާއްސަ އިސްކަމެއް ދޭކަމަށް ފެނަކައިން މީގެ ކުރިން ބުނެފައި ވެއެވެ.
ފެނަކަ އައްޑޫ އޮފީހުގެ އޮފިޝަލަކު ވިދާޅުވި ގޮތުގައި ކުރިއަށް އޮތް ގަޑިއެއް ހާއިރުގެ ތެރޭގައި ކަރަންޓު ކެނޑިފައިވާ ހިސާބުތަކަށް ކަރަންޓުގެ ޚިދުމަތް އަލުން ދެވޭނެއެވެ.