ފެނަކަ ކޯޕަރޭޝަނުގެ މެނޭޖިން ޑިރެކްޓަރުގެ މަގާމުގައި ހުންނެވި އަހުމަދު ޝަރީފް، އިލެކްޝަންސް ކޮމިޝަނުގެ މެމްބަރު ކަމަށް އައްޔަން ކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
އިދިކޮޅު މެމްބަރުންގެ ބައިވެރިވުމަކާ ނުލާ ކުރިއަށް ދިޔަ މަޖިލީހުގެ މިއަދުގެ ޖަލްސާގައި ޝަރީފް އީސީގެ މެމްބަރު ކަމަށް އައްޔަން ކުރުމަށް ވޯޓަށް އެހުން ވަނީ ތާވަލުކޮށްފައެވެ.
ވޯޓުގައި ބައިވެރިވި މެމްބަރުންގެ ތެރެއިން 33 މެމްބަރުން އޭނާ އީސީގެ މެމްބަރު ކަމަށް އައްޔަން ކުރުމަށް ވޯޓު ދީފައިވެއެވެ. ދެކޮޅަށް ވޯޓު ދިނީ ތުޅާދޫ ދާއިރާގެ މެމްބަރު ނާޒިމް ރަޝާދު އެކަންޏެވެ.
މިނިވަން މުއައްސަސާ ތަކާ ބެހޭ ކޮމިޓީން ޝަރީފަށް ރުހުން ދީ، ނަން ފާސްކޮށްފައިވަނީ އިންޓަވިއުކޮށް، 77.3 ޕަސެންޓު މާކްސް ލިބިގެންނެވެ.
ފެނަކަ ކޯޕަރޭޝަނުގެ މެނޭޖިން ޑިރެކްޓަރުގެ މަގާމުގައި މިވަގުތު ހުންނެވި ޝަރީފަކީ އީސީ ސެކެޓްރީ ޖެނެރަލްގެ މަގާމުވެސް ފުރުއްވާފައިވާ ބޭފުޅެކެވެ.