އައްޑޫ ސިޓީ ކައުންސިލްގެ ދެ ވަނަ ދައުރުގެ ކައުންސިލަރުކަން ކުރެއްވި ބޭފުޅުން ވިޔަފާރި އާއި އާމްދަނީގެ ތަފްސީލް ކައުންސިލަށް ހުށަހަޅާފައި ނުވާ ކަން ހާމަވެއްޖެ އެވެ.
އޮޑިޓް އޮފީހުން ނެރުނު އައްޑޫ ސިޓީ ކައުންސިލް އިދާރާގެ 2015 ވަނަ އަހަރުގެ އޮޑިޓް ރިޕޯޓްގައި ބުނެފައިވާ ގޮތުގައި، ކައުންސިލް މެންބަރުންގެ އާމްދަނީ އާއި ވިޔަފާރީގެ މައުލޫމާތު ކައުންސިލް އިދާރާއަށް ހުށަހަޅާފައި ނުވާކަމުގެ މައުލޫމާތު އެ އިދާރާއިން ލިބިފައިވާ ކަމަށެވެ.
ލާމަރުކަޒީ ޤާނޫނުގެ 124 ވަނަ މާއްދާގައި ބަޔާންކޮށްފައިވާ ގޮތުގައި ކައުންސިލް މެންބަރަކު އިންތިޚާބުވުމާއި އެކު މެންބަރެއްގެ ފައިސާއާއި ވިޔަފާރީގެ މައުލޫމާތު އަދި އާމްދަނީ އާއި އާމްދަނީ ލިބޭ ގޮތްތަކާއި ވިޔަފާރީގެ ގުޅުންތަކާއި ބެހޭ މައުލޫމާތު ލިޔުމަކުން ކައުންސިލް އިދާރާއަށް ހުށަހަޅަން ޖެހެއެވެ.
އޮޑިޓަރ ޖެނެރަލް ޙަސަން ޒިޔަތު ސޮއިކުރައްވައި ނެރުއްވާފައިވާ ކައުންސިލް އިދާރާގެ އޮޑިޓް ރިޕޯޓްގައި ވަނީ ކައުންސިލްގެ ހުރިހާ މެންބަރުން ވެސް އާމްދަނީ އާއި ވިޔަފާރީގެ މައުލޫމާތު ޤާނޫނާއި އެއްގޮތަށް ހުށަހެޅުމަށް ލަފާދެއްވާފައެވެ.