އިދިކޮޅު ފަރާތްތަކުން މާރޗް މަހުގެ 2 ވަނަ ދުވަހު ބޭއްވި މުޒާހަރާގެ ތެރެއިން ހައްޔަރުކުރިތާ ހަފްތާއެއް ވާން ކައިރިވެފައި ވާއިރުވެސް ތަހުގީގަށް ފުލުހުން އެއްވެސް ސުވާލެއް ނުކުރާކަމަށް ކުރީގެ ޕޮލިސް ކޮމިޝަނަރ އަދި ކިނބިދޫ ދާއިރާގެ މެންބަރު އަބްދުﷲ ރިޔާޒް ވިދާޅުވެއްޖެއެވެ.
ކުއްލި ނުރައްކަލުގެ ހާލަތުގެ ދަށުން ކަމަށް ބުނެ ހައްޔަރުކޮށްފައިވާ ރިޔާޒްގެ ފަރާތްޕުޅުން މިގޮތަށް ވިދާޅުވެފައި ވަނީ ކެންދޫ ދާއިރާގެ މަޖިލިސް މެންބަރު އަލީ ޙުސައިން އެވެ.
"މިހިރީ ގަދަކޮށް، ބޭނުންވަނީ ޔާމީންގެ ޚުދުމުހުތާރު އަނިޔާވެރިކަމުން ރައްޔިތުން ސަލާމަތްކުރުމަށް". ކުރީގެ ސީޕީ ރިޔާޒް.
ރިޔާޒް ވިދާޅުވި ގޮތުގައި އެބޭފުޅާގެ މައްޗަށް ތުހުމަތުކުރެވޭ ކުށެއް މިހާތަނަށް ފުލުހުން ބުނެދީފައި ނުވާކަމަށެވެ. ފުލުހުން ކޮންމެ ގޮތަކަށް ކަންތައް ކުރި ނަމަވެސް ރިޔާޒް ވިދާޅުވެފައި ވަނީ، އެބޭފުޅާ ހުންނެވީ ވަރަށް ގަދަކޮށް ކަމަށެވެ.
އަދި ބޭނުންފުޅުވަނީ ޔާމީންގެ ޚުދުމުހުތާރު އަނިޔާވެރިކަމުން ރައްޔިތުން ސަލާމަތްކުރުމަށް ކަމަށް ރިޔާޒް ވަނީ ވިދާޅުވެފައެވެ.