އައްޑޫ ސިޓީ ހިތަދޫ ފިހާރައެއްގެ ފުރާޅުން ޓިނު ނައްޓައިގެން ވަދެ ވައްކަންކޮށްފި އެވެ.
ވައްކަން ކޮށްފައިވަނީ ހިތަދޫ އައިލެންޑް ޓީވީ ކައިރީ ހުންނަ "ކަޑާސް އެޓިކް" ފިހާރައިންނެވެ.
'އައްޑޫލައިވް' އަށް މައުލޫމާތު ދެމުން އެ ފިހާރައިން ވާހަކަ ދެއްކި މީހަކު ބުނީ، ފިހާރައިން ވައްކަން ކޮށްފައިވަނީ ރޭ ދަންވަރުގެ ވަގުތެއްގައި ކަމަށެވެ.
އޭނާ ބުނި ގޮތުގައި ފިހާރައިން ވަގަށް ނަގާފައިވާ ތަކެތީގެ ޖުމްލަ އަގު އަދި ބުނަން ނޭނގޭ ކަމަށާއި އެހެން ނަމަވެސް ފިހާރައިން ބައެއް މުދާ ވަގަށް ގެންގޮސްފައިވާ ކަމަށެވެ.
ފިހާރައަށް ވަގުން ވަދެފައި ވަނީ، ފުރާޅުން ޓިނު ނެއްޓުމަށް ފަހު ސީލިންގް ގައި ބާގަނޑެއް ހަދައިގެންނެވެ. އަދި މިއީ މިފިހާރަ ފެޅި ތިން ވަނަ ފަހަރު ކަމަށް ފިހާރައިގެ ފަރާތުން ވާހަކަ ދެއްކި މީހާ ބުންޏެވެ.
މި މައްސަލަ ހިތަދޫ ޕޮލިސް ސްޓޭޝަނުން މިހާރު ގެންދަނީ ތަހުގީގް ކުރަމުންނެވެ.