އައްޑޫގެ އަވަށްތަކުގެ އިތުރު މަގުތައް ރަނގަޅު ފެންވަރަަކަށް ހަދާނެ ބަޔަކު ހޯދަން ރައީސް ޔާމީންގެ ސަރުކާރުން އެތައް އިއުލާނެއް ކުރިއެވެ. އެތައް ފަހަރަކު މަގު ހަދަން ބޭނުންވާ ފައިސާ ދައުލަތުގެ ބަޖެޓުގައި ހިމަނައެވެ.
އެހެން ނަމަވެސް އެމަނިކުފާނުގެ ވެރިކަމުގެ ދައުރު ނިމެން 6 މަސް ދުވަހަށް ވެފައި ވާއިރު އައްޑޫގެ ރަށްތަކުގެ މަގުތައް ހެދުމަށް އެކަށީގެންވާ މަސައްކަތެއް ކުރެވިފައެއް ނުވެއެވެ.
އައްޑޫގެ ގުޅިފައިވާ އަވަށްތަކުގެ ތެރެއިން ބިމުގެ ގޮތުން އެންމެ ބޮޑު އަވަށް ކަމުގައިވާ ހިތަދޫގައި ރައީސް ޔާމީންގެ ސަރުކާރުގައި ތާރުއެޅުނީ، އެންމެ މަގެއްގައި 600 ފޫޓަށެވެ.
ހިތަދޫ ރީޖަނަލް ހޮސްޕިޓަލް ހުންނަ ރަށްދެބައި މަގުގައި ތާރު އަޅާފައި ވަނީ 2014 ވަނަ އަހަރުގެ މަޖިލިސް އިންތިޚާބުގެ ކެމްޕެއިންގެ ތެރޭގައެވެ. އޭރު ހިތަދޫގެ އިތުރު މަގުތަކެއްގައި ތާރު އަޅައިގެން ރަނގަޅު ފެންވަރަކަށް ހަދާނެ ވާހަކަ ސަރުކާރުން ދެއްކިއެވެ.
އެހެން ނަމަވެސް މިއަދާއި ހަމައަށް ވެސް ތާރު އަޅައިގެން ވެސް އަދި އެހެން ގޮތަކަށް ވެސް މި ސަރުކާރުން ހިތަދޫގެ އެއްވެސް މަގެއް ރަނގަޅު ފެންވަރަކަށް ހަދާފައި ނުވެއެވެ.
2011 ވަނަ އަހަރު ބޭއްވި ސާކް ސަމިޓާއި ދިމާކޮށް، ރައީސް މުހައްމަދު ނަޝީދުގެ ވެރިކަމުގައި ހިތަދޫގައި ތާރު އަޅައިގެން ހެދި މަގުތައް 5 ކިލޯ މީޓަރަށް ވުރެ ދިގެވެ.
އެމްޑީޕީގެ ވެރިކަން ނިމުމަށް ފަހު އައްޑޫގައި ހުރި ތާރު އަޅާ މެޝިން ވެސް ވަނީ އައްޑޫން ބޭރަށް ގެންގޮސްފައެވެ. ބޭނުން ނުކޮށް ގިނަ ދުވަސް ވަންދެން ހުރުމަށް ފަހު ތާރުއަޅާ މެޝިން އައްޑޫން ގެންދިޔައީ ރައީސް ޔާމީންގެ ވެރިކަމުގައެވެ.