އަޅުގަނޑުމެންގެ ތެރޭގައި ބޭރުގެ ނުފޫޒުތައް ވަރުގަދަވުމުގެ އެންމެ ބޮޑު ސަބަބަކީ، އަޅުގަނޑުމެންގެ ބަލިކަށިކަން ކަމަށް ރައީސް ޑރ. މުޙަންމަދު ވަޙީދު ހަސަން މަނިކު ވިދާޅުވެއްޖެ އެވެ.
ރައީސް މިހެން ވިދާޅުވީ ރ. އަލިފުށްޓަށް ވަޑައިގެން އަލިފުށީ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ. އަޅުގަނޑުމެންގެ ތެރޭގައި ބައިބައިވުން އުފެދޭ ކޮންމެ ފަހަރަކު އަދި ހަމަނުޖެހުން އުފެދޭ ކޮންމެ ފަހަރަކު، ބޭރުގެ ނުފޫޒުތައް އަޅުގަނޑުމެންގެ ތެރެ އަށް ވަދެ، އަޅުގަނޑުމެންގެ ތެރޭގައި ހަމަނުޖެހުން އުފެއްދުމަށް މަސައްކަތް ކުރާނެ ކަމަށް ރައީސް ވިދާޅުވި އެވެ.
ރައީސްގެ ވާހަކަފުޅުގައި މި އާ ސިޔާސީ މަސްރަހުގެ ތެރޭގައި، އެކި ފިކުރުގެ މީހުން އެ ބައުޅޭކަން ފާހަގަ ކުރައްވަމުން، އެހެން ނަމަވެސް، މި ހުރިހާ ފިކުރުތަކަށް ވުރެ ބޮޑު ފިކުރެއް އެބައޮ ތް ކަމަށް ވިދާޅުވި އެވެ.
ރައީސް ވިދާޅުވި ގޮތުގައި، އެ ފިކުރަކީ މާތް ވެގެންވާ އިސްލާމްދީނުގެ ފިކުރެވެ. ޤައުމަށްޓަކައި އޮންނަ ލޯތްބެއްގެ ފިކުރެވެ. އެހެންވީމާ، މާތް ވެގެންވާ އިސްލާމް ދީނާއި، ޤައުމުގެ މަޞްލަޙަތު، އެހެން ހުރިހާ އެއްޗަކަށް ވުރެ އިސް ކުރަން ޖެހޭ ކަމަށާއި، ޤައުމު ރަމްޒުކޮށްދޭ ޤައުމީ ސަލާމާއި، ޤައުމީ ދިދައާއި، ޤައުމީ ކުލަތައް، އެހެން ހުރިހާ އެއްޗަކަށްވުރެ އިސްކުރަން ޖެހޭ ކަމުގައި ރައީސް ވިދާޅުވި އެވެ.
މި ރޮނގުން ވާހަކަފުޅު ދައްކަވަމުން، މި ޤައުމު ވަރުގަދަ ވާނީ، ޤައުމުގެ ރައްޔިތުންގެ މެދުގައި އެކުވެރިކަމާއި އެއްބާރުލުން އޮވެގެން ކަމަށާއި، ޢާއިލާތަކުގެ މެދުގައި ވެސް އަދި އެކަކު އަނެކަކާ ދޭތެރޭގައި ވެސް ހިތްބަރު ކަމެއް ނުބާއްވައި، އެކުވެރިކަން ބަދަހިކޮށްގެން ކަމުގައި ރައީސް ވިދާޅުވި އެވެ.
އަޅުގަނޑުމެންގެ ޢާއިލާތަކުގެ ތެރޭގައި، ސިޔާސީ ފިކުރު މާބޮޑަށް އިސް ކުރުމުގެ ސަބަބުން އެކަކު އަނެކަކާ ވާހަކަ ނުދައްކާ ހިސާބަށް ކަންކަން ގޮސްފައި އެބަހުރި ކަމަށް ވިދާޅުވެ، ސިޔާސީ ފިކުރާ ހެދި ޢާއިލާތައް ބައިބައި ނުކުރުމަށް ރައީސް އިލްތިމާސް ކުރެއްވި އެވެ. އަދި ރަށުގެ ތަރައްޤީއަށްޓަކައި، ޤައުމުގެ ތަރައްޤީއަށްޓަކައި އަދި ދަރިންނަށްޓަކައި ގުޅިގެން މަސައްކަތް ކުރުމަށް ވެސް ރައީސް އެދިވަޑައިގެންނެވި އެވެ.