ޕްރޮސެކިއުޓާ ޖެނެރަލް އައިޝަތު ބިޝާމް މާދަމާ ހެނދުނުގެ ވަގުތެއްގައި ފުލުހަށް ހާޒިރުކުރުމަށް ނިންމާފައިވާ ކަމުގެ އަޑުތަކެއް ފެތުރެމުން އެބަދެއެވެ.
ސޯޝަލް މީޑިޔާގައި އަޑުފެތުރުމުންދާ ގޮތުގައި މާދަމާ ހެނދުނުގެ ވަގުތެއްގައި ބިޝާމް ފުލުހުންގެ އިދާރާއަށް ހާޒިރު ކުރާނެއެވެ. އެހެން ނަމަވެސް މިކަމާއި ބެހޭގޮތުން ފުލުހުންގެ ބަހެއް އަދި ވަނީ ލިބޭގޮތް ނުވެފައެވެ.
ބިޝާމް ފުލުހަށް ހާޒިރުކުރަން އުޅޭ ކަމުގެ އަޑުތައް ފެތުރެމުން ދާއިރު، ކުއްލި ނުރައްކަލުގެ ހާލަތުގެ ގަރާރާ މެދު ރައްޔިތުންގެ މަޖިލީހުން ނިންމި ނިންމުން ގާނޫނުއަސާސީއާ ޚިލާފް ކަމަށް އެކަމަނާ ވަނީ ވިދާޅުވެފައެވެ.
މަޖިލީހުގެ ނިންމުން ޤާނޫނު އަސާސީ އާޢި ޚިލާފުކަމަށް ވިދާޅުވެ ބިޝާމް ފުލުހުންނަށް ސިޓީއެއް ފޮނުއްވުމުން ޕީޕީއެމްގެ ފަރާތުން ވަނީ ބިޝާމް އަށް ބަހުގެ ހަމަލާތަކެއް ފޮނުވާލާފައެވެ. އެގޮތުން ޕީޕީއެމްގެ ނައިބު ރައީސް، ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވެފައި ވަނީ އެފަދަ ނިންމުމެއް ޕީޖީ އަށް ނުނިންމެވޭނެ ކަމަށެވެ.
އަބްދުއްރަހީމް މިހެން ވިދާޅުވެފައި ވަނިކޮށް ޕީޖީ އޮފީހުގެ ގިނަ އަދަދެއްގެ ވަކީލުން ވަނީ ބިޝާމް އަށް ތާއީދުކޮށް ޕެޓިޝަނެއް ވެސް އެކުލަވާލާފައެވެ.