މާލެ ފިޔަވައި ރާއްޖޭގެ އެހެން ސަރަހައްދެއްގައި ޓްރެފިކް ޕޮލިސް ޑިޕާޓްމަންޓެއް އެންމެ ފުރަތަމަ ޤާއިމް ކުރި ތަނަކީ އައްޑު އެވެ. ޖޫން، 9، 2014 ގައި ވަނަ އައްޑޫގައި ޓްރެފިކް ޕޮލިހުންގެ ޚިދުމަތް ރަސްމީކޮށް ފެށީ ބޮޑެތި ވައުދުތަކާއި އެކުގައެެވެ. އައްޑޫގެ މަގުތައް އަމާންކޮށްދޭނެ ކަމަށް ވައުދު ވަމުންނެވެ.
އައްޑޫގައި ޓްރެފިކް ޕޮލިހުގެ ޚިދުމަތް ދޭން ފެށުމާއި އެކު މަގުމަތީގައި ބާރު ސްޕީޑްގައި ދުއްވުން ކޮންމެވެސް ވަރަކަށް މަޑުޖެހުނެވެ. އެސަަބަބަށްޓަކައި ޓްރެފިކް ޕޮލިހުންގެ ޚިދުމަތް އައްޑޫގެ ރައްޔިތުން އުފަލާއި އެކު ބަލައިގަތެވެ.
ނަމަވެސް ރައްޔިތުންނަށް ލިބުނު ހިތްހަމަޖެހުމާއި އުފާވެރިކަން މާ ގިނަ ދުވަހެއް ނުވެ "ބީޥެގެން" ދިޔައީ ޓްރެފިކް ބެލެހެއްޓުމުގައި ތިބޭ ފުލުހުންގެ އަދަދު މަދުވާން ފެށުމުންނެވެ. އެގޮތުން ޓްރެފިކް ޕޮލިސްގެ ޚިދުމަތް އައްޑޫގައި ފެށިތާ އަހަރެއް ނުވެ، ޓްރެފިކް ޕޮލިހުގައި މަސައްކަތް ކުރާނެ ފުލުހަކު ނެތް ހިސާބަށް ކަންތައް ދިޔައެވެ.
ޤަވާއިދާއި ޚިިލާފަށް ބާރު ސްޕީޑްގައި ދުއްވާ ފަރާތްތަކާއި މެދު ފިޔަވަޅު އެޅުމަށް ފުލުހުން ކުރާ ހަމައެކަނި މަސައްކަތަކީ ލައިސަންސް އާއި އަހަރީ ފީ ޗެކްކުރުން ކަމަށް ވެގެން އައްޑޫގެ މަގުތައް އަމާން ކުރެވޭކަށް ނެތެވެ.
ޓްރެފިކް ޕޮލިސް ޑިޕާޓްމަންޓެއްގެ ނަން ބޯޑެއް ހިތަދޫގައި ހުރި ފުލުހުންގެ އިމާރާތެއްގެ ބޭރުގައި ހުއްޓަސް ރަސްމީކޮށް ޓްރެފިކް ބެލެހެއްޓުމުގެ މަސައްކަތް ކުރާ ފުލުހުންނެއް އައްޑޫގައި އެފަހުން ހަރަކާތްތެރިވަމުންނެއް ނުދެއެވެ. ޓްރެފިކް އޮޕަރޭޝަންތައް ހިންގަމުން ދިޔައީ، ހަމައެކަނި އެކްސިޑެންޓްތައް ގިނަވާ ދުވަސްތަކާއި ދިމާކޮށެވެ.
އައްޑޫގެ ގިނަ ރައްޔިތުން އެފަދަ އޮޕަރޭޝަންތައް ސިފަކުރަނީ "ލައިސަންސް ބަލާ" އޮޕަރޭޝަންގެ ގޮތުގައެވެ. ސަބަބަކަށް ވަނީ ފުލުހުން ހިންގާ އެފަދަ އޮޕަރޭޝަންތަކުގައި ބާރު ސްޕީޑްގައި ދުއްވާ ފަރާތްތަކާއި މެދު ފިޔަވަޅު އަޅަމުން ނުދާތީއެވެ.
ޓްރެފިކް ޕޮލިސް ޑިޕާޓްމަންޓުގެ މަސައްކަތް ހުއްޓިފައި އޮންނަތާ 2 އަހަރެއްހާ ދުވަސް ފަހުން، 2017 ވަނަ އަހަރުގެ އޭޕްރީލް މަހުގެ ތެރޭގައި އައްޑޫގައި ދެވަނަ ފަހަރަށް ޓްރެފިކް ފުލުހުންގެ ޚިދުމަތް އިފްތިތާޙްކުރިއެވެ. ކުލަގަދަ ރަސްމިއްޔާތަކާއި އެކުގައި، "މިކަމެއް ދެން ނުހުއްޓޭނެ" ކަމަށް ބުނަމުންނެވެ. އެހެން ނަމަވެސް އެވާހަކަތައް ވެސް ފަންފުލުން ދިޔައީއެވެ.
ދެވަނަ ފަހަރަށް ޓްރެފިކް ޕޮލިސް އިފްތިތާޙް ކުރުމަށް ފަހު "އައްޑޫލައިވް" އާއި ވާހަކަ ދައްކަވަމުން ޗީފް އިންސްޕެކްޓަރ އޮފް ޕޮލިސް އަލީ ރަޝީދު ވިދާޅުވެފައި ވަނީ، ޓްރެފިކް ބެލެހެއްޓުމުގެ މަސައްކަތް ފުލުހުން ނެތިގެން ހުއްޓަވާ ނުލައްވާނެކަމަށާއި، ހަރުދަނާ އުސޫލެއްގެ ދަށުން މަގުމަތީގެ އަމާންކަން ބެލެހެއްޓުމުގެ މަސައްކަތް ފުލުހުން ކުރިއަށްގެންދާނެ ކަމަށެވެ.
އައްޑޫގެ މަގުތަކުގައި ހިނގާފައިވާ ނުރައްކާތެރި އެކްސިޑެންޓްތަކަށް ބަލާއިރު ޤަވާއިދާއި ޚިލާފަށް ބާރު ސްޕީޑްގައި ދުއްވާ ވެހިކަލް ތަކުން ޖެހި އެތައް ބަޔަކަށް ބޮޑެތި އަނިޔާތަކެއް ލިބިފައި އެބަހުއްޓެވެ.އަދި އެތައް ބައެއްގެ ފުރާނަ ވެސް އެފަދަ ހާދިސާތަކުގައި ގެއްލިފައިވެއެވެ.
އައްޑޫއަށް ޓްރެފިކް ފުލުހުންގެ ޚިދުމަތް އެކަށީގެންވާ ގޮތެއްގައި ބޭނުންވާ އެއް ސަބަބަކީ، ދޭތެރެއަކުން ހިންގާ ޓްރެފިކް އޮޕަރޭޝަނަކުން ޤަވާއިދާއި ޚިލާފަށް ބާރު ސްޕީޑްގައި ވެހިކަލް ދުއްވާ ފަރާތްތަކާއި މެދު ނުހުއްޓުވުމެވެ.
ޤަވާއިދާއި ޚިިލާފަށް ބާރު ސްޕީޑްގައި ދުއްވާ ފަރާތްތަކާއި މެދު ފިޔަވަޅު އެޅުމަށް ފުލުހުން ކުރާ ހަމައެކަނި މަސައްކަތަކީ ލައިސަންސް އާއި އަހަރީ ފީ ޗެކްކުރުން ކަމަށް ވެގެން އައްޑޫގެ މަގުތައް އަމާން ކުރެވޭކަށް ނެތެވެ.
އެކަން ކުރެވެން އޮތީ 24 ގަޑިއިރު އައްޑޫގެ މަގުތަކުގައި ޓްރެފިކް ބަލަހައްޓާނެ ފުލުހުން ބައިތިއްބައިގެންނެެވެ. އެކަން ކުރެވެން އޮތީ ތިން ވަނަ ފަހަރަށް ޓްރެފިކް ޕޮލިސްގެ ޚިދުމަތް އައްޑޫގައި އިފްތިތާޙްކޮށްގެން ކަމަށް ވާނަމަ އެކަން ވެސް ކުރަންވީއެވެ.
ރައްޔިތުންނަށް އަމާން މާޙައުލެއް ޤާއިމްކޮށްދިނުމަކީ ފުލުހުންގެ ވާޖިބެކެވެ. އެމީހުންގެ ޒިންމާއެކެވެ. އެއީ ފުލުހުންނަށް ވަގުތެއް ވީމައި ދޭތެރެއަކުން ކުރަންޖެހޭ ކަމެއް ނޫނެވެ.