ކުރީގެ ރައީސް މުހައްމަދު ނަޝީދާއެކު ސިއްރު މަޝްވަރާތަކެއް ކޮށްފައިވާ ކަމަށް ސަރުކާރުން ބުނެފިއެވެ.
ސަރުކާރުގެ ފަރާތުން މިކަން ހާމަކުރީ ސިޔާސީ ޕާޓީތަކާއި އެކު ސަރުކާރުން ބާއްވާ މަޝްވަރާތަކުގައި އިސްކޮށް ހުންނަވާ ފިޝަރީޒް މިނިސްޓަރު ޑރ. މުހައްމަދު ޝައިނީ އެވެ.
ޝައިނީ ވިދާޅުވި ގޮތުގައި އިދިކޮޅު ބައެއް ސިޔާސީ ލީޑަރުންނާއި ސަރުކާރުން މަޝްވަރާ ކުރީ، "ފުންނާބު އުސް ބޭރުގެ ބައެއް ބޭފުޅުން މެދުވެރިކޮށް" ކަމަށެވެ.
"އަޅުގަނޑުމެން އިދިކޮޅު އިސްވެރިންނާއި ވަކި ވަކިން މަޝްވަރާ ކުރިން. އެގޮތުން އޭރު އެންމެ ފުޅާކޮށް މަޝްވަރާ ކުރެވުނީ ރައީސް ނަޝީދާއި އެކު،" ޝައިނީ ވިދާޅުވި އެވެ.
ޝައިނީ ވިދާޅުވި ގޮތުގައި ނަޝީދާއި އެކު ބޭއްވި މަޝްވަރާގައި ކަފާލާތުގެ އުސޫލުގެ ތެރެއިން ފަނޑިޔާރުން ދޫކޮށްލަން ވެސް ހުށަހެޅި ކަމަށެވެ.
ރައީސް ޔާމީންގެ ސަރުކާރުގެ ދިފާއުގައި މިހާރު އެންމެ ބޮޑަށް މަސައްކަތް ކުރައްވަމުން ގެންދަވާ މިނިސްޓަރު ޝައިނީ ވިދާޅުވީ އޭރު ކުރެވުނު މަޝްވަރާތައް ސިއްރު ކުރުމަށް ވެސް ދެފަރާތުން އެއްބަސްވެފައިވާ ކަމަށެވެ. އެހެން ނަމަވެސް އެކަން މިއަދު ހާމަކުރަން ޖެހުނީ، އިދިކޮޅު ސިޔާސީ ފަރާތްތަކުން އޭގެ ބައެއް ކަންކަން އާންމުންނަށް ހާމަކުރަމުން ކަމަށެވެ.
ޝައިނީގެ ވާހަކަފުޅުގައި ވިދާޅުވި ގޮތުގައި، ސަރުކާރާއި ނަޝީދާއި ދެމެދު ޑޮކިއުމެންޓްތަކެއް ވެސް ބަދަލު ކުރެވިފައިވެއެވެ.