ފަނޑިޔާރުންގެ ގާނޫނަށް އިސްލާހު ގެންނަނީ، ކުއްލި ނުރައްކަލުގެ ހާލަތުގެ ގަރާރުގެ ދަށުން ހައްޔަރުކޮށްފައިވާ އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދަށް ފިޔަވަޅު ނޭޅިގެން ކަމަށް ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ ވިދާޅުވެއްޖެއެވެ.
ޓިނުތަކެއް ވަގަށް ނަގައިގެން މީގެ ކުރިން ހުކުމެއް ތަންފީޒުކޮށްފައިވާ ކަމަށް ބުނެ ގިނަ ބައެއްގެ ފާޑުކިޔުންތައް އަމާޒުވެފައިވާ ޕީޕީއެމްގެ ނައިބު ރައީސްކަން ކުރައްވާ އަބްދުއްރަހީމް މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުންނެވެ.
އަދުރޭ ވިދާޅުވި ގޮތުގައި ގާނޫނީ ގޮތުން އުފެދިފައި އޮތް ސަރުކާރެއް ވައްޓާލުމަށް ގެނެވުނު ބަގާވާތެއްގެ އެންމެ އިސް ސަފުގައި ތިބި ކަމަށް ތުހުމަތުތަކުން އެނގެނީ އެންމެ އިސް ކޯޓުގައި މަސައްކަތް ކުރާ އެންމެ އިސް ދެ ފަނޑިޔާރުން ކަމަށެވެ.
އެހެން ނަމަވެސް ފަނޑިޔާރުންގެ ގާނޫނު އޮތް ގޮތުން އެ މީހުންނާ މެދު އެކަށިގެންވާ ފިޔަވަޅު އެޅުމުގެ ފުރުސަތެއް ނެތް ކަމަށް އޭނާ ވިދާޅުވިއެވެ.
ފަނޑިޔާރުންގެ ގާނޫނަށް އަބްދުއްރަހީމް އިސްލާހުގައި ބުނެފައިވާ ގޮތުން ފަނޑިޔާރެއްގެ މައްޗަށް ޖިނާއީ ކުށެއް ސާބިތުވުމުން ފަނޑިޔާރުކަން ގެއްލޭނެއެވެ.