އަންނަ އަހަރު ރާއްޖޭގައި ބޭއްވުމަށް ހަމަޖެހިފައިވާ އޭއެފްސީ ޗެލެންޖް ކަޕް ކުޅުމަށް ހަމަޖެހިފައިވާ ދަނޑުތައް ތަރައްޤީ ކުރުމުގެ ގޮތުން ކުރަން ހުރި މަރާމާތުތައް ފަރުމާ ކުރުމަށް ފަސް ފަރާތަކުން ބިޑް ހުށައަޅާފައިވާ ކަމަށް ސްޕޯޓްސް މިނިސްޓްރީން ބުނެފިއެވެ.
އޭއެފްސީ އިން ބާއްވާ މުބާރާތުގެ މެޗްތައް ކުޅުމަށް ހަމަޖެހިފައި ވަނީ ގަލޮޅު ރަސްމީ ދަނޑާއި ސ. ހިތަދޫ ޒޯން ސްޓޭޑިއަމްގަ އެވެ.
ސްޕޯޓްސް މިނިސްޓްރީން ބުނީ އޭއެފްސީ ޗެލެންޖް ކަޕް ކުޅުމަށް ހަމަޖެހިފައިވާ ދެ ސްޓޭޑިއަމް ކަމަށްވާ، ގަލޮޅު ރަސްމީ ދަނޑާއި ހިތަދޫ ޒޯން ސްޓޭޑިއަމް، ތަރައްގީ ކުރުމުގެ ގޮތުން ކުރަން ހުރި މަރާމާތުތައް ފަރުމާ ކުރުމާއި، މަސައްކަތްތަކުގެ ކޮންސަލްޓެންސީ ދޭނެ ފަރާތެއް ހޯދުމަށް ބޭނުން ވާތީ، އެކަމަށް ޝައުގުވެރިކަން ހުރި ފަރާތެއް ހޯދުމަށް މިނިސްޓުރީން އެ ފުރުސަތު ހުޅުވާލާފައިވާ ކަމަށެވެ.
އެގޮތުން އެ ހުޅުވާލި ފުރުސަތުގެ މުއްދަތު ހަމަވި އިރު އެ މަސައްްކަތް ކުރުމަށް ބިޑު ހުށައަޅާފައި ވަނީ ފަސް ފަރާތަކުން ކަމަށް ވެސް މިނިސްޓުރީން ބުންޏެވެ.
މިނިސްޓުރީން ބުނީ ދަނޑުތައް މަރާމާތު ކުރުމަށް ފަސް ފަރާތުން ހުށައެޅި ބިޑްތައް ބަލައިގަންފައިވާ ކަމަށާއި ބިޑްތައް އިވެލުއޭޓު ކުރުމުގެ މަސައްކަތް މިހާރު ކުރިއަށް ގެންދާ ކަމަށެވެ.
އޭއެފްސީ ޗެލެންޖް ކަޕަށް ދެ ސްޓޭޑިއަމް ތަރައްގީ ކުރުމަށް ކުރިއަށް ގެންދާ މަޝްރޫއުގެ ދަށުން ގަޅޮޅު ދަނޑުގައި މީޑިޔާއަށާއި މެޗް ކޮމިޝަނަރަށް ހާއްސަ ރޫމުތަކެއް ހެދުމާއި، ހިތަދޫ ޒޯން ސްޓޭޑިއަމްގައި ދެ ޗޭންޖިން ރޫމް ހެދުމަށް ވަނީ ހަމަޖެހިފަ އެވެ.