ޤާނޫނީ ވަކީލުންނަކީ ހަމައެކަނި ޤާނޫނުގައި އޮންނަ އެއްޗެއް އެނގޭ ބަޔަކަށް ވެގެން ނުވާނެ ކަމަށް ފޭދޫ ދާއިރާގެ މަޖިލިސް މެންބަރު އިބްރާހިމްދީދީ ވިދާޅުވެއްޖެއެވެ.
އިބްރާހިމްދީދީ މިހެން ވިދާޅުވީ ރައްޔިތުންގެ މަޖިލީހުގައި ހޯމަ ދުވަހު ބޭއްވި ޖަލްސާގައި ވާހަކަ ދައްކަވަމުންނެވެ.
އިބްރާހިމްދީދީ ވިދާޅުވީ، ޤާނޫނަކީ ދިވެހި ބަހުން ލިޔެފައި އޮތް އެއްޗެއް ކަމަށާއި އެހެންވެ ޤާނޫނުގައި ލިޔެފައިވާ އެއްޗެއް އެބޭފުޅުންނަށް ވެސް އެނގިލައްވާ ކަމަށެވެ.
"ގާނޫނީ ވަކީލުންނަކީ ހަމައެކަނި ގާނޫނުގައި އޮންނަ އެއްޗެއް އެނގޭ ބަޔަކަށް ވެގެނެއް ނުވާނެ. ގާނޫނު އޮންނަނީ ދިވެހި ބަހުން ލިޔެފަ. އަޅުގަނޑުމެންނަށް ވެސް އެނގޭ ގާނޫނުގައި ލިޔެފައި އޮންނަ އެއްޗެހި".
އިބްރާހިމްދީދީ ވިދާޅުވިއެވެ.
މީގެ އިތުރުން އިބްރާހިމްދީދީ ވަނީ ޤާނޫނީ ވަކީލުންނާއި ފަނޑިޔާރުން ޤާނޫނު އޮޅުވާލައި އެކި މާނަތައް ނަންގަވާ ކަމުގެ ތުހުމަތު ވެސް ކުރައްވާފައެވެ.
"ވަކީލު މީހާ ބޭނުންވާ އިރަށް ގާނޫނު އޮޅުވައިލާފަ. ދިވެހިރާއްޖޭގައި މިކަހަލަ ވަކީލުންތައް ބައިވަރު އެބައުޅޭ މިހާރު ގާނޫނުތައް އުވާލައިގެން އަމިއްލައަށް ގާނޫނުތަކުގައި
ހުންނަ މާއްދާތައް ނުބައިކޮށް ކިޔާ މީހުން."
– އިބްރާހިމްދީދީ
ޤާނޫނުގެ މާއްދާތައް ނުބައިކޮށް ކިޔާ ވަކީލުން އުޅޭ ކަމަށް އިބްރާހިމްދީދީ ވިދާޅުވި ނަމަވެސް އެއީ ކޮން ވަކީލުންނެއް ކަމެއް ވިދާޅު ނުވެއެވެ. އެހެން ނަމަވެސް އެ ވަކީލުންގެ އަޑުތައް އައްސަވަން ބޭނުން ނުވާ ކަމަށް ވިދާޅުވިއެވެ.