ރާއްޖޭގެ މަޝްހޫރު ވާހަކަ ލިޔުންތެރިޔާ ބިންމާ އިބްރާހީމް ވަހީދުގެ ވާހަކަތަކަށް ހާއްސަ ވެބް ސައިޓެއް ހެދުމުގެ މަސައްކަތް ފަށާފައިވާ ކަމަށް އޭނާ ބުނެފި އެވެ.
ބިންމާގެ އެފްބީ ސްޓޭޓަސްގައި ބުނެފައި ވަނީ "ބިންމާ.ކޮމް" ގެ ނަމުގައި ހަދާ ސައިޓަކީ އޭނާގެ ހުރިހާ ވާހަކައެއް ހިމެނޭ ސައިޓަކަށް ވާނެ ކަމަށެވެ. އަދި އެ ސައިޓަކީ ކިޔުންތެރިންނަށް ހިލޭ ވާހަކަ ކިޔޭނެ ސައިޓެއް ކަމަށް ބިންމާ ބުންޏެވެ.
"ހިތް ފަސޭހަ މަންޒަރު" ގެ ނަމުގައި ފުރަތަމަ ވާހަަކައެއް ލިޔެ މި ދާއިރާ އަށް ނިކުތް އަދި އާންމުކޮށް "ހަވީރު" ނޫހުގައި ވާހަކަތައް ޝާއިއު ކުރާ ބިންމާ އިތުރަށް ބުނީ ސައިޓް ނިމުމުން ކިޔުންތެރިންނަށް އަންގާލާނެ ކަމަށެވެ.
"އެހެނަސް" ގެ ނަމުގައި ބިންމާ ޖެނުއަރީ 31، 1994 ވަނަ އަހަރުން ފެށިގެން "ހަވީރު" ނޫހަށް ވާހަކަ ލިޔެމުން އަަންނަ އިރު މިހާތަނަށް، ވަރަށް ގިނަ އަދަދެއްގެ ވާހަކަަތައް އޭނާ ލިޔެފައިވެ އެވެ. އަދި އޭގެ ތެރެއިން ގިނަ ވާހަކަތަކަކީ ކިޔުންތެރިންގެ މަގުބޫލްކަން ވެސް ހޯދާފައިވާ ވާހަކަތަކެވެ.
ބިންމާގެ އެންމެ ފާހަގަކޮށްލެވޭ ވާހަކަތަކުގެ ތެރޭގައި "ފަތިސްހަނދުވަރު"، "ގަނޑުފެން"، "ދައުވަތު"، "ޝާހްބާޒް"، "ލޯބީގެ ހަދިޔާ"، "ފަތިސްހަނދުވަރުގެ ފެށުން"، "އިޝްގް"، "ކޮންމެވެސް އެއް ދުވަހަކުން" ފަދަ ވާހަކަތައް ހިމެނެ އެވެ. އަދި މިހާރު "ހަވީރު" ގައި ޝާއިއު ކުރަމުން އަންނަ "ހިންތާ" އަކީ ވެސް ކިޔުންތެރިންގެ ބޮޑު ތަރުހީބެއް ލިބެމުން އަންނަ ވާހަކައެކެވެ.
ދިގު ވާހަކައިގެ އިތުރަށް އޭނާ ވަނީ ގިނަ އަދަދެއްގެ ކުރު ވާހަކަ ވެސް ލިޔެފަ އެވެ. ނޫހުގައި ވާހަކަ ލިއުމުގެ އިތުރަށް، ނޫހުގައި ނުޖަހާ ބައެއް ވާހަކަތައް އޭނާ ފޮތުގެ ސިފައިގައި ބާޒާރަށް ނެރެފައި ވެސް ވެ އެވެ. އޭގެ ތެރޭގައި "ހައްގު" އަދި "7 ދުވަސް" އާއި "އިއްތިފާގް" ފަދަ ވާހަކަތައް ހިމެނެ އެވެ.
މީގެ އިތުރަށް އޭނާ ވަނީ ކުޑަ ކުދިންގެ ހާއްސަ 30 ވާހަކަ ވެސް ބާޒާރަށް ނެރެފަ އެވެ. އަދި އޭނާ ލިއުނު ކުރު ވާހަކަަތައް "25 ކުރު ވާހަކަ" ނަމުގައި އޭގެ 9 ކަލެކްޝަން ވެސް ބާޒާރަށް ނެރެފައިވެ އެވެ. މި ވާހަކަތައް "http://books.novelty.com.mv/book/binma-ibrahim-waheed-kuruvaahaka-8#/2" ލިންކުން މިހާރު ވެސް ކިޔާލެވެން ވެސް ހުރިކަން ފާހަގަކޮށްލެ އެވެ.
ބިންމާގެ ވާހަކަތަކަށް ފިލްމް ވެސް ވަނީ ހަދާފަ އެވެ. އޭގެ ތެރޭގައި "ހައްގު"، "ފަތިސްހަނދުވަރު"، "ފަތިސްހަނދުވަރުގެ ފެށުން"، "ޖިންނި"، "14 ވިލޭރޭ" "ވެހޭ ވާރޭތެރެއިން"، "ހިތްހެޔޮ ކުރާތި"، "ނިއުމާ"، "ލަވް ސްޓޯރީ"، "ހަނދުކޭތަ" ފަދަ ފިލްްމްތައް ހިމެނެ އެވެ.
އަދި އޭނާ ލިއުނު ބައެއް ވާހަކަތަަކަށް ޓީވީ ޑްރާމާ ވެސް ހަދާފައިވެ އެވެ. އޭގެ ތެރެއިން އެންމެ ފާހަގަކޮށްލެވޭ އެއް ޑްރާމާއަކީ "ތިއޭ މި ހިތުގެ ވިންދަކީ" އެވެ.
ބިންމާ ވަނީ ވާހަަކަ ލިއުމުގެ ދާއިރާ އިން ގިނަ ކާމިޔާބީތަކެއް ވެސް ހޯދާފަ އެވެ. އެގޮތުން ވާހަކަ ލިއުމުގެ ރޮނގުން އޭނާ އަށް ވަނީ 1995 ވަނަ އަހަރު ރައީސްގެ އެވޯޑް ވެސް ލިބިފަ އެވެ.
އަދި ދިވެހި ބަހާއި ތާރީހަށް ހިދުމަތް ކުރާ ގައުމީ މަރުކަޒުން 1987-1991 އަށް ބޭއްވި ވާހަކަ ލިއުމުގެ މުބާރާތްތަކުން ވެސް ވަނަތައް ހާސިލްކޮށްފައިވެ އެވެ.
ބިންމާ އަށް ވަނީ 1996 ވަނަ އަހަރު ފިލްމް ފެސްޓިވަލްގައި އޭނާގެ "ހައްގު" ވާހަކަ އަށް ހެދި ފިލްމުން އެންމެ މޮޅު ވާހަކައިގެ އެވޯޑާއި 1997 ވަނަ އަހަރު "ފަތިސްހަނދުވަރު" އިން އެންމެ މޮޅު ވާހަކަ އަދި ޑައިލޮގް "އާފަތިސް އެވޯޑް" ވެސް ހާސިލްކޮށްފަ އެވެ.
ބިންމާ ވަނީ ވާހަކަ ލިއުމުގެ އިތުރަށް ބައެއް ފިލްމާއި ވީޑިއޯ ލަވަތައް ވެސް ކުޅެފަ އެވެ. އޭނާ އެކްޓްކޮށްފައިވާ ފިލްމްތަކުގެ ތެރޭގައި "ދެރިޔާ" އަދި "ހީލަތް" ހިމެނެ އެވެ.