ރައީސް އަބްދުﷲ ޔާމީންގެ އަމިއްލަފުޅު އެކައުންޓަށް ޖަމާ ކުރި އެއް މިލިއަން ޑޮލަރު އެމަނިކުފާނު ބޭނުން ކުރެއްވި ކަމަށް އަދާލަތު ޕާޓީގެ ނައިބް ރައީސް އަލީ ޒާހިރު ވިދާޅުވެއްޖެއެވެ.
އިސްލާމިކް ބޭންކް އޮފް މޯލްޑިވްސްގައި ހުޅުވާފައިވާ ރައީސް ޔާމީންގެ އެކައުންޓަށް 1 މިލިއަން ޑޮލަރު ޖަމާކޮށްފައި ވަނީ އެމްއެމްޕީއާރުސީގެ ހިޔާނާތުގައި ބައިވެރިވި ކަމަށް ތުހުމަތު ކުރެވޭ އެސްއޯއެފް ކުންފުނިންނެވެ.
މިކަމާއި ބެހޭގޮތުން އަލީ ޒާހިރު ކުރެއްވި ޓްވީޓެއްގައި ވިދާޅުވެފައި ވަނީ އެސްއޯއެފުން ޖަމާކުރި ފައިސާ ހުސްވަންދެން ރައީސް ޔާމީން ބޭނުން ކުރެއްވި ކަމަށެވެ.
އަލީ ޒާހިރު ވިދާޅުވި ގޮތުގައި އެސްއޯއެފުން ޖަމާކުރި 1 މިލިއަން ޑޮލަރު ރައީސް ޔާމީން ބޭނުންފުޅު ކުރެއްވިކަން އޭސީސީގައި އޮތް އެމަނިކުފާނުގެ އެކައުންޓުގެ ސްޓޭޓުމެންޓުން ހާމަވާނެ ކަމަށެވެ.
އަލީ ޒާހިރު މިހެން ވިދާޅުވެފައި ވާއިރު އިއްޔެ ޕީޕީއެމް އިން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ޕީޖީ ގްރޫޕްގެ ލީޑަރު ނިހާނު ވިދާޅުވެފައިވާ ގޮތުގައި ރައީސް ޔާމީންގެ އެކައުންޓަށް ޖަމާކުރި 1 މިލިއަން ޑޮލަރު ހުރީ އޭސީސީގެ ބެލުމުގެ ދަށުގައި ކަމަށެވެ.