ފެބްރުއަރީ މަހުގެ 1 ވަނަ ދުވަހު ދިވެހިރާއްޖޭގެ ސުޕްރީމް ކޯޓުގެ 5 ފަނޑިޔާރުންގެ އިއްތިފާޤުން ނެރުނު އަމުރު ތަންފީޒު ކުރެވެން ނެތްކަމަށް ސަރުކާރުން ބުނެފިއެވެ.
ސަރުކާރުން މިހެން ބުނެފައިވަނީ، ފެބްރުއަރީ މަހުގެ 1 ވަނަ ދުވަހު ސުޕްރީމް ކޯޓުން ނެރުނު އަމުރު ތަންފީޒު ކުރުމަށް ގޮވާލާ ޔޫރަޕިއަން ޔޫނިއަން (އީޔޫ) ގެ ޕާލިމެންޓުން ނެރުނު ޤަރާރަށް ރައްދު ދެމުންނެވެ.
ސަރުކާރުން ސުޕްރީމް ކޯޓުގެ އަމުރެއް ތަންފީޒު ކުރެވެން ނެތްކަމަށް ބުނެ ހުއްޖަތެއްގެ ގޮތުގައި ދައްކާފައި ވަނީ ފެބްރުއަރީ 1ގެ އަމުރު ސުޕްރީމް ކޯޓުގެ 3 ފަނޑިޔާރަކު ނެރުއްވި އަމުރަކުން ބާތިލްކޮށްފައި ވުމެވެ.
އެހެން ނަމަވެސް ރާއްޖޭގައި ތިއްބެވި ފުންނާބު އުސް ޤާނޫނީ ވަކީލުން ބުނާ ގޮތުގައި 5 ފަނޑިޔާރުންގެ އިއްތިފާޤުން ނެރުނު އަމުރެއް 3 ފަނޑިޔާރުންނަށް ބާތިލްކުރެވޭ ޤާނޫނީ ހަމައެއް ނެތެވެ.