ގުޅިފައިވާ ސިޔާސީ ޕާޓީތަކުން މިރޭ މާލޭގައި ބާއްވާ އެއްވުން ނިންމާލުމަށްފަހު ގެއަށް ވަންނާނީ ރައީސް ޔާމީނު ހުއްޓުވާފައި ކަމަށް އެ ޕާޓީތަކުން ބުނެފިއެވެ.
އިދިކޮޅު ޕާޓީތަކުން ބޭއްވި ނޫސްވެރިންގެ ބައްދަލުވުމުގައި މިހެން ވިދާޅުވީ، މަޑުއްވަރީ ދާއިރާގެ މެމްބަރު މުހައްމަދު އަމީތެވެ.
އަމީތު ވިދާޅުވި ގޮތުގައި މާލޭގެ މަޖީދީމަގާއި ޗާންދަނީ މަގު ގުޅޭ ކަންމަތީގައި "ހުއްޓުވާ" ނަމުގައި ބާއްވާ އެއްވުން ނިންމާލުމަށް ފަހު ގެއަށް ވަންނާނީ ރައީސް ޔާމީނު ހުއްޓުވާފައި ކަމަށެވެ. އަދި މިރޭ ރައީސް ޔާމީނަށް ރައްޔިތުންގެ އަޑު އިވޭނެ ކަމަށް ވެސް އަމީތު ވަނީ ވިދާޅުވެފައެވެ.
މީގެ އިތުރުން މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވީ ރައްޔިތުންގެ އަޑު އަހަން ރައީސް ޔާމީނަށް މިރޭ މަޖުބޫރުވެވަޑައިގަންނަވާނެ ކަމަށެވެ.