ދިވެހިރާއްޖޭގެ ސުޕްރީމް ކޯޓުން ރައީސް އަބްދުﷲ ޔާމީން ހައްޔަރުކުރަން އަމުރު ކުރިޔަސް އެކަން ތަންފީޒު ނުކުރާނެ ކަމަށް ރައީސް އޮފީހުގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރު ވިދާޅުވެއްޖެ އެވެ.
އާޒިމާ މިހެން ވިދާޅުވީ، އިދިކޮޅު ފަރާތްތަކުން މާލޭގައި ރޭ ކުރި މުޒާހަރާ ބޭއްވި ވަގުތާއި ދިމާކޮށް ސަރުކާރުން ބޭއްވި ނޫސް ކޮންފަރެންސެއް ގައެވެ.
އާޒިމާ ވިދާޅުވި ގޮތުގައި ސުޕްރީމް ކޯޓުން ރައީސުލްޖުމްހޫރިއްޔާ ހައްޔަރު ކުރެއްވުމަށް އަމުރެއް ކުރެއްވިޔަސް މިހާރު އޮތް ގާނޫނުއަސާސީގެ ދަށުން އެއީ ކުރެވެން އޮތް ކަމެއް ނޫން ކަމަށެވެ.
"ސުޕްރީމް ކޯޓުން ރައީސުލްޖުމްހޫރިއްޔާ ހައްޔަރު ކުރެއްވުމަށް އަމުރެއް ކުރެއްވިޔަސް މިހާރު އޮތް ގާނޫނުއަސާސީގެ ދަށުން އެއީ ކުރެވެން އޮތް ކަމެއް ނޫން. އެހެންވީމަ އަޅުގަނޑުމެން އެކަން ވެސް ތަންފީޒެއް ނުކުރާނަން." އާޒިމާ ވިދާޅުވި އެވެ.
އާޒިމާ މިހެން ވިދާޅުވި ނަމަވެސް ދިވެހިރާއްޖޭގެ ޤާނޫނު އަސާސީ ބުނާގޮތުން ޤާނޫނު އަސާސީ އާ ޚިލާފަށް ބަޔަކު ކަމެއްކުރިކަން ނިންމުމަކީ ސަރުކާރަށް ލިބިގެންވާ ބާރެއް ނޫނެވެ.