ރައްޔިތުންގެ މަޖިލީހުުގެ ދިއްގަރު ދާއިރާގެ މެމްބަރު އަދި ކުރީގެ ރައީސް މައުމޫންގެ ދަރިކަލުން އަހުމަދު ފާރިސް މައުމޫން ފުރަގަހަށް ބިޑިއެޅުވުމަށް ފަހު ބިންމަތީގައި ދަމާފައި ގޮޅިން ނެރުމުގެ ސަބަބުން އަނިޔާތަކެއް ލިބިފައިވާ ކަމަށް ފާރިސްގެ ވަކީލުން ބުނެފިއެވެ.
ފާރިސްގެ ވަކީލް މައުމޫން ހަމީދު ކުރެއްވި ޓްވީޓެއްގައި ވިދާޅުވެފައި ވަނީ އިއްޔެގެ ހަވީރުގެ ވަގުތެއްގައި 6 ފުލުހަކު ވެގެން ފާރިސް ބިޑި އެޅުވުމަށްފަހު ގަދަކަމުން ބިންމަތީގައި ދަމާފައި ގޮޅިން ނެރުނު ކަމަށެވެ.
ފުލުހުން ފާރިސް ގޮޅިން ނެރުނީ ތަހުގީގަށް ސުވާލު ކުރުމަށް ކަމަށް ބުނެ ކަމަށް ވިޔަސް ވަކީލުންނާއި ނުލައި ތަހުގީގަށް އެއްބާރުލުން ދޭން ފާރިސް ދެކޮޅު ހެދުމުން އަލުން ގޮޅިއަށް ވެއްދި ކަމަށް މައުމޫނު ހަމީދު ވިދާޅުވިއެވެ.
މައުމޫން ހަމީދު ވިދާޅުވި ގޮތުގައި ފާރިސް ބިންމަތީގައި ދަމާފައި ގޮޅިން ނެރުމުން އޭނާގެ ކޮނޑަށް ވަނީ އަނިޔާވެފައެވެ. އަދި ދޫނިދޫގައި ތިބި ޑޮކްޓަރުން ޓެސްޓުތަކެއް ހެދުމަށް ލަފާދިނަސް އަދިވެސް އެކަން ފުރިހަމަ ކޮށްފައެއް ނުވެއެވެ.