ފެބްރުއަރީ މަހުގެ 5 ވަނަ ދުވަހުގެ ރޭ ސުޕްރީމް ކޯޓުގެ ފުރާޅުން ޓިނު ނައްޓައިގެން ވަދެ ހައްޔަރު ކޮށްފައިވާ އުއްތަމަ ފަނޑިޔާރު އަބްދުﷲ ސަޢީދާއި ދެކޮޅަށް ކުރާ ދައުވާގެ ޝަރީއަތް މިއަދު ބޭއްވުމަށް ކްރިމިނަލް ކޯޓުގައި ތާވަލުކޮށްފި އެވެ.
ކުއްލި ނުރައްކަލުގެ ހާލަތުގެ ޤަރާރުގެ ދަށުން ކަމަށް ބުނެ އުއްތަމަ ފަނޑިޔާރު އަބްދުﷲ ސައީދު ހައްޔަރުކުރި ފަހުން އެމަނިކުފާނު ބަންދުކޮށްފައި ހުންނަވަނީ ދޫނިދޫ އެވެ.
މައުލޫމާތު ލިބިފައިވާ ގޮތުގައި މިއަދު މެންދުރު ފަހު 3:00 އަށް ކްރިމިނަލް ކޯޓުގައި ޝެޑިއުލްކޮށްފައިވަނީ އަބްދުﷲ ސަޢީދުގެ މައްޗަށް އުފުލާފައިވާ ދައުލަތުގެ މަސައްކަތަށް ހުރަސް އެޅި ކަމަށް ބުނާ މައްސަލައިގެ ދައުވާގެ އަޑުއެހުމެކެވެ.
އުއްތަމަ ފަނޑިޔާރު އަބްދުﷲ ސައީދުގެ މައްޗަށް ދައުލަތުގެ މަސައްކަތަށް ހުރަސް އެޅި ކަމުގެ ދައުވާ އުފުލާފައިވަނީ ރައީސް އޮފީހުގެ ހަތަރު ސިޓީއެއް ސުޕްރީމް ކޯޓަށް ފޮނުވުމުން އީ-ގަވަރްމެންޓް ނިޒާމް ބޭނުން ނުކުރެވޭ ގޮތް ހެދި ކަމަށް ބުނެއެވެ.